गावकऱ्यांना एकत्र आणणारा आक्केवार परिवाराचा उत्सव

ढोल-ताशांच्या गजरात भक्तिमय मिरवणुकीची शोभा

आमचा विदर्भ - प्रविण चिडे

विरूर स्टेशन (दि. ०९ सप्टेंबर २०२५) -

        परंपरा ही संस्कृतीचे खरे द्योतक मानली जाते. विरुर येथील आक्केवार परिवाराने अखंड श्रद्धा आणि निष्ठेने सलग ७६ वर्षांपासून गणेशोत्सवाची परंपरा जपत गावात भक्ती, संस्कृती आणि सामाजिक ऐक्याचा वारसा जपला आहे. सन १९४९ मध्ये घरगुती स्वरूपात सुरू झालेली ही गणेश स्थापना आज तीन पिढ्यांच्या निष्ठेने गावकऱ्यांसाठी प्रेरणास्थान ठरली आहे. ही परंपरा धार्मिकतेबरोबरच सामाजिक बांधिलकीचीही साक्ष देणारी आहे.

        यंदा देखील हा गणेशोत्सव मोठ्या उत्साहात पार पडला. गणेशोत्सवाचे आयोजन विलास आक्केवार, गणेश आक्केवार व साई आक्केवार यांच्या पुढाकाराने करण्यात आले. गणेशोत्सव काळात आयोजित विविध धार्मिक उपक्रमांमध्ये ग्रामस्थांचा उत्स्फूर्त सहभाग दिसून आला. विशेष आकर्षण ठरली ती भजनांच्या तालावर काढलेली मिरवणूक. ढोल-ताशांच्या गजरात, भजनी मंडळांच्या गजरात झालेल्या या मिरवणुकीने गावभर आध्यात्मिक वातावरण निर्माण केले.

        तसेच, या प्रसंगी महाप्रसादाचे आयोजन करून गावातील सर्व वयोगटातील नागरिकांना एकत्र आणण्यात आले. उत्सवात गावकऱ्यांचा मोठ्या संख्येने सहभाग झाला आणि आनंदाचे वातावरण निर्माण झाले. गेल्या ७६ वर्षांपासून आक्केवार परिवार जपत असलेली ही परंपरा श्रद्धा, संस्कृती आणि सामाजिक एकतेचे जिवंत उदाहरण ठरत असून ही परंपरा गावकऱ्यांच्या स्मरणात कायम राहील अशी आहे.

#GaneshFestival #WirurTradition #AkkewarFamily #76YearsOfFaith #CulturalHeritage #BhajanProcession #CommunityUnity #wirurstation #wirurcityupdate #pravinchidenews #chandrapurnews #chandrapurcity #chandrapur #aamchavidarbha #vidarbha