शांताराम पोटदुखे विधी महाविद्यालयात आंतरराष्ट्रीय योग दिन उत्साहात साजरा

शांताराम पोटदुखे विधी महाविद्यालयात आंतरराष्ट्रीय योग दिन उत्साहात साजरा

आमचा विदर्भ - दीपक शर्मा

चंद्रपूर (दि. २३ जून २०२५) –

        धकाधकीच्या आणि तणावपूर्ण जीवनशैलीत योगसाधना ही आरोग्याचे मूलभूत शस्त्र ठरते. शांताराम पोटदुखे विधी महाविद्यालय, चंद्रपूर येथे राष्ट्रीय सेवा योजना (NSS) विभाग व पतंजली योग सेवा समिती चंद्रपूर यांच्या संयुक्त विद्यमाने ११ वा आंतरराष्ट्रीय योग दिन उत्साहात साजरा करण्यात आला. या कार्यक्रमाचे अध्यक्षस्थान महाविद्यालयाचे प्राचार्य डॉ. एजाज शेख यांनी भूषवले. पतंजली योग सेवा समितीचे प्रतिनिधी देविदासजी ठावरी, श्रीकांतजी बावणे, सौ. मंजूषा तपासे, शामराव हरडे यांनी उपस्थित विद्यार्थ्यांसमोर विविध योगासने सादर केली व त्याचे प्रत्यक्ष मार्गदर्शन दिले.

        ठावरी सरांनी प्रत्येक आसनाचे फायदे, शरीरावर होणारे परिणाम, साधनेचा योग्य कालावधी यावर अभ्यासपूर्ण माहिती दिली. तर श्रीकांत बावणे यांनी सांगितले की, “योगामुळे आपण फक्त शरीराने नव्हे, तर मनानेही सुदृढ होतो. योग म्हणजेच अंतर्मुख होण्याची साधना आहे.” या उपक्रमाचे नियोजन NSS प्रमुख नंदकिशोर भंडारी आणि माजी NSS प्रमुख डॉ. सरोज कुमार दत्ता यांनी उत्तम प्रकारे पार पाडले. कार्यक्रमात सर्व प्राध्यापक, शिक्षकेत्तर कर्मचारी आणि विद्यार्थी मोठ्या संख्येने सहभागी झाले होते.

        प्राचार्य डॉ. एजाज शेख यांनी आपल्या मार्गदर्शनपर भाषणात म्हटले, “आजच्या स्पर्धात्मक जीवनात योग साधना म्हणजे मानसिक शांततेचा, आरोग्याचा आणि आत्मिक संतुलनाचा मार्ग आहे. त्यामुळे प्रत्येक विद्यार्थ्याने योग दिनाची एकदिवसीय परंपरा न मानता ती जीवनशैली म्हणून स्वीकारावी.” कार्यक्रमाचे संचालन डॉ. लीना लंगडे यांनी केले, तर आभार प्रदर्शन डॉ. सरोज कुमार दत्ता यांनी केले.