बॅनरबाजीच्या उत्सवात ''जास''नामाच्या कुत्र्याची एन्ट्री!

बॅनरबाजीच्या उत्सवात ''जास''नामाच्या कुत्र्याची एन्ट्री!

"राजुरात बॅनरबाजीचा महासण सुरू – कुत्र्यांचाही हक्क राखला!"

आमचा विदर्भ - दीपक शर्मा

राजुरा (दि. १८ मे २०२५) -

        राजुरा शहरात हल्ली बॅनरबाजीचा नवा ट्रेंड जोर धरू लागला आहे. नेते, कार्यकर्ते आणि आता तर मुक्या जनावरांचेही वाढदिवस बॅनरवर साजरे होऊ लागले आहेत. ताज्या प्रकरणात मॉर्निंग ग्रुपच्या वतीने 'साज' नामक कुत्र्याचा वाढदिवस शहरातील संविधान चौकात आणि जुना बस स्टॅन्ड ते संविधान चौकापर्यंत महामार्गाच्या मधा मधात बॅनर लावून साजरा केला. होय, तुम्ही बरोबर वाचलंत! साज नामक कुत्र्याचा वाढदिवस बॅनरवर!

        एकीकडे शहरातील अरुंद रस्त्यांवर वाहतूक कोंडीचा प्रश्न गंभीर होत असताना, बॅनरबाजीने सण, कार्यक्रम, वाढदिवस चौकाचौकांमध्ये साजरे केले जात आहेत. तहसील कार्यालयापासून संविधान चौकापर्यंत मधल्या काळात बँनरबाजीला ऊत आले आहे. 

        रस्त्याच्या मधोमध लावलेले बॅनर अपघातास कारणीभूत ठरत आहे. नगर परिषदेच्या परवानगीशिवाय बॅनर लावले जात आहेत काय? नगर परिषदेने कोणत्या नियमाप्रमाणे अरुंद रस्त्याच्या मधोमध बॅनर लावण्याची परवानगी दिली जेणेकरून वाहतुकीला अडथळा होईल. अपघाताची शक्यता वाढत असताना प्रशासन झोपेत आहे की बॅनरवर शुभेच्छा देणाऱ्या नेते, नेत्यांचे कार्यकर्ते कि मुक्या प्राण्यांसोबत सेल्फी काढण्यात गुंतले आहे, हे मात्र अजून गुलदस्त्यात आहे.

        शहरातील नागरिकांचे मत आहे की, बॅनरबाजीसाठी ठराविक ठिकाणे निश्चित करावीत आणि नेते, नेत्यांच्ये कार्यकर्ते, मुक्या जनावरांच्या वाढदिवसाचे कार्यक्रम त्यांच्या घरच्या अंगणात साजरे करावेत. कारण शहराच्या रस्त्यांना 'हॅप्पी बर्थडे'चा सण साजरा करण्यापेक्षा वाहतुकीचे नियमन अधिक आवश्यक आहे.