श्री स्वामी समर्थ प्रकटदिन उत्सव; भक्तिरसात भाविक तल्लीन

Shri Swami Samarth Pragat

श्री स्वामी समर्थ प्रकटदिन उत्सव; भक्तिरसात भाविक तल्लीन

श्री स्वामी समर्थ मंदिरात दर्शनासाठी लोटला जनसागर

आमचा विदर्भ - अनंता गोखरे

राजुरा (दि. ०१ एप्रिल २०२५) -

        श्री स्वामी समर्थ महाराजांच्या प्रगटदिनानिमित्त गुरुमंदिर येथे प्रगटदिन उत्सव आणि पालखी सोहळ्याचे आयोजन करण्यात आले. सोमवार, ३१ मार्च रोजी भक्तिभावाने विविध धार्मिक कार्यक्रम पार पडले. हजारो स्वामीभक्तांनी सहपरिवार उपस्थित राहून स्वामींच्या कृपाशीर्वादाचा लाभ घेतला.

स्वामी कृपेचा दरबार – भक्तिमय वातावरण

        सोहळ्याची सुरुवात सकाळी ९:३० वाजता अभिषेकाने झाली. मंदिरात गजर, मंत्रोच्चार आणि स्वामी समर्थांच्या जयघोषाने भक्तिरसाची अनुभूती मिळाली. त्यानंतर सकाळी ११:३० वाजता मंदिरात भव्य महानैवेद्य आरती पार पडली. दुपारी १२ ते ३ या वेळेत महाप्रसादाचे आयोजन करण्यात आले होते, जिथे हजारो भक्तांनी प्रसादाचा लाभ घेतला.

पालखी सोहळ्याची भव्य मिरवणूक

        संध्याकाळी ६ वाजता श्री स्वामी समर्थ महाराजांची पालखी गुरुमंदिरातून मोठ्या भक्तिभावाने काढण्यात आली. पालखीचा मार्ग पोस्ट ऑफिस, राजीव गांधी चौक, आंबेडकर चौक, नेहरू चौक, गांधी चौक मार्गे पुन्हा गुरुमंदिर येथे विसर्जित करण्यात आला. पालखी मार्गावर भक्तांनी आपल्या घरासमोर रांगोळी काढून व फुलांचा वर्षाव करून पालखीचे स्वागत केले. "अक्कलकोट महाराज की जय!" च्या गजराने संपूर्ण परिसर भक्तिमय झाला होता.

सामाजिक व राजकीय क्षेत्रातील मान्यवरांची उपस्थिती

        दिवसभर विविध राजकीय नेते, सामाजिक कार्यकर्ते, प्रतिष्ठित व्यापारी व भाविकांनी स्वामींचे दर्शन घेतले. अनेक भाविकांनी स्वामींच्या चरणी नतमस्तक होत त्यांच्या कृपाशीर्वादाने आपले जीवन सुख-समाधानाने भरून जाण्याची प्रार्थना केली.

कार्यक्रमाची यशस्वी सांगता – भक्तांच्या सेवाभावी योगदानाने

        या भव्य सोहळ्याच्या यशस्वितेसाठी सर्व स्वामी भक्तांनी अथक परिश्रम घेतले. मंदिर व्यवस्थापनाने उत्कृष्ट नियोजन करून सर्व सोहळा निर्विघ्नपणे पार पाडला. स्वामी समर्थ महाराजांचे "दिगंबरा, दिगंबरा श्रीपाद वल्लभ दिगंबरा" या जयघोषाने वातावरण भक्तिमय झाले. स्वामी समर्थ महाराजांच्या कृपेने हा सोहळा भविष्यातही अधिक उत्साहाने साजरा करण्याचा संकल्प भक्तांनी केला. या सोहळ्यात सहभागी झालेल्या प्रत्येक भक्तांच्या जीवनात स्वामींचे आशीर्वाद सतत राहोत, अशी प्रार्थना आयोजकांनी श्रींच्या चरणी केली.