"संघर्षातून यशाकडे: प्रशांत भोयर यांचा प्रेरणादायी प्रवास"

"संघर्षातून यशाकडे: प्रशांत भोयर यांचा प्रेरणादायी प्रवास"

बालविद्या शिक्षण प्रसारक मंडळातर्फे सत्कार

आमचा विदर्भ - दीपक शर्मा

राजुरा (दि. ०१ एप्रिल २०२५) -

        महाराष्ट्र लोकसेवा आयोगामार्फत (MPSC) घेण्यात आलेल्या पोलीस उपनिरीक्षक (PSI) परीक्षेत राजुरा येथील प्रशांत शशिकलाताई विजय भोयर यांनी घवघवीत यश मिळवले आहे. सामान्य कुटुंबात जन्मलेल्या प्रशांतने आपल्या जिद्दीच्या जोरावर हे यश संपादन केले. त्यांच्या या कर्तृत्वाचा गौरव बालविद्या शिक्षण प्रसारक मंडळातर्फे करण्यात आला.

        प्रशांतने आपल्या शिक्षणाच्या प्रवासात अनेक अडचणींवर मात केली. त्यांच्या वडिलांचे स्वप्न सैन्यात भरती होण्याचे होते, पण कौटुंबिक कारणांमुळे त्यांना संधी सोडावी लागली. मात्र, त्यांनी आपल्या मुलांना उत्तम शिक्षण देण्याचा निर्धार केला. मोठा भाऊ ललितकुमार सैन्यात भरती झाला, तर प्रशांतने पोलीस उपनिरीक्षक पद मिळवून कुटुंबाच्या स्वप्नांना नवे पंख दिले. पहिल्या दोन प्रयत्नांमध्ये अवघ्या काही गुणांनी अपयश आल्यावरही प्रशांतने हार मानली नाही. पुण्यात जाऊन कठोर अभ्यास केला आणि तिसऱ्या प्रयत्नात PSI पदावर आपले नाव कोरले. त्यांच्या या यशानंतर संपूर्ण राजुरा परिसरात आनंद आणि अभिमानाची लाट उसळली आहे.

      प्रशांतने आपल्या यशाचे श्रेय आई-वडील, भाऊ ललितकुमार, तसेच मार्गदर्शन करणारे आतिश धोटे यांना दिले. त्यांच्या या यशस्वी प्रवासाचा सन्मान करत बालविद्या शिक्षण प्रसारक मंडळाचे अध्यक्ष सतीश धोटे आणि सचिव भास्करराव येसेकर यांनी त्यांचा सत्कार केला. प्रशांत भोयर यांचा हा संघर्षमय प्रवास अनेक विद्यार्थ्यांसाठी प्रेरणादायी ठरला आहे. त्यांच्या जिद्दीचा हा प्रवास नव्या पिढीला स्वप्न उंच उडण्याची उमेद देणारा आहे, असे बालविद्या शिक्षण प्रसारक मंडळाचे अध्यक्ष सतीश धोटे यांनी म्हटले.