व्हॉट्सॲप हॅक करून २५६ जणांना सायबर जाळ्यात ओढण्याचा प्रयत्न

आरटीओ टॅक्स चालानच्या नावाने पाठवली एपीके फाईल; रामनगर पोलिसांत तक्रार

आमचा विदर्भ - दीपक शर्मा 

चंद्रपूर (दि. ०२ ऑक्टॉबर २०२६) -

         मोबाईलवर एपीके लिंक पाठवून नागरिकांची फसवणूक करून बँक खाती रिकामी करणारी सायबर टोळी चंद्रपूर जिल्ह्यात सक्रिय असल्याचे समोर आले आहे. विविध कारणांचा आधार घेत नागरिकांना एपीके फाईल किंवा लिंक पाठवून ती डाऊनलोड करण्यास प्रवृत्त केले जाते. त्यानंतर मोबाईल आणि व्हॉट्सॲपचा ताबा मिळवून संबंधितांच्या संपर्कातील नागरिकांनाही त्याच जाळ्यात ओढले जात असल्याची धक्कादायक बाब समोर आली आहे.

        या प्रकाराला आळा घालण्यासाठी एपीके लिंकच्या माध्यमातून सायबर फसवणूक करणाऱ्या टोळ्यांचा शोध घेऊन त्यांच्यावर कठोर कारवाई करावी, अशी मागणी सामाजिक कार्यकर्ते सचिन मंडल यांनी पत्रकार परिषदेत केली. नागरिकांनी अनोळखी व्यक्तींकडून आलेल्या एपीके फाईल, लिंक किंवा संशयास्पद संदेशांपासून सावध राहावे, असे आवाहनही त्यांनी केले.

सचिन मंडल यांच्या व्हॉट्सॲपवर संशयास्पद संदेश

       सामाजिक कार्यकर्ते सचिन मंडल यांनी पत्रकार परिषदेत घटनेची माहिती देताना सांगितले की, ३० सप्टेंबर रोजी दुपारी सुमारे ४ वाजता एका महिलेच्या मोबाईल क्रमांकावरून त्यांच्या व्हॉट्सॲपवर संदेश प्राप्त झाला. या संदेशामध्ये ‘आरटीओ टॅक्स चालान एपीके’ नावाची फाईल होती. तसेच ‘लिस्टमध्ये आपले नाव व पत्ता चेक करा’ असा मजकूरही या संदेशासोबत देण्यात आला होता. शासकीय कामकाजाशी संबंधित चालान असावे, असा समज झाल्याने मंडल यांनी संबंधित एपीके फाईल डाऊनलोड केली. मात्र, हीच फाईल पुढे त्यांच्या मोबाईल आणि व्हॉट्सॲपसाठी धोकादायक ठरली.

साडेतीन तासांत व्हॉट्सॲप हॅक

        एपीके फाईल डाऊनलोड केल्यानंतर अवघ्या साडेतीन तासांत, म्हणजेच त्याच दिवशी सायंकाळी सुमारे ७.३० वाजता सचिन मंडल यांचे व्हॉट्सॲप हॅक झाल्याचे त्यांच्या निदर्शनास आले. सायबर भामट्यांनी त्यांच्या मोबाईलचा ताबा घेतल्यानंतर त्यांच्या व्हॉट्सॲप क्रमांकाचा गैरवापर सुरू केला. हॅकर्सनी मंडल यांच्या मोबाईल क्रमांकावरून तब्बल २५६ लोकांचा ब्रॉडकास्ट ग्रुप तयार केला. या ग्रुपच्या माध्यमातून मंडल यांच्या संपर्कातील नागरिकांना पुन्हा त्याच धोकादायक एपीके लिंकचा संदेश पाठविण्यात आला.

विश्वासाचा गैरफायदा घेत तीन मित्रांची फसवणूक

        सचिन मंडल यांच्या मोबाईल क्रमांकावरून आलेला संदेश असल्याने त्यांच्या संपर्कातील अनेकांना तो विश्वासार्ह वाटण्याची शक्यता होती. याचाच फायदा घेत सायबर भामट्यांनी एपीके लिंक इतरांपर्यंत पोहोचवली. मंडल यांच्या तीन मित्रांनी त्यांच्या क्रमांकावरून आलेली असल्याने संबंधित लिंक उघडली. त्यानंतर त्यांच्या बँक खात्यातून सायबर चोरट्यांनी पैसे लंपास केल्याचे समोर आले. त्यामुळे एका व्यक्तीचा मोबाईल हॅक केल्यानंतर त्याच्या संपर्कातील इतर नागरिकांनाही फसवणुकीच्या जाळ्यात ओढण्याचा सायबर गुन्हेगारांचा प्रयत्न असल्याचे या घटनेतून स्पष्ट झाले आहे.

घटना लक्षात येताच पोलिसांत तक्रार

        आपले व्हॉट्सॲप हॅक झाल्याचे तसेच आपल्या संपर्कातील मित्रांची आर्थिक फसवणूक झाल्याचे लक्षात आल्यानंतर सचिन मंडल यांनी तातडीने रामनगर पोलीस ठाणे गाठले. त्यांनी या प्रकरणाची रीतसर तक्रार दाखल केली. पोलिसांनी हे प्रकरण पुढील तपासासाठी सायबर सेलकडे वर्ग केले असून, सायबर तज्ज्ञांकडून या प्रकरणाचा तपास सुरू करण्यात आला आहे. या प्रकरणातील सायबर गुन्हेगारांचा शोध घेऊन त्यांच्यावर कठोर कारवाई होण्याची अपेक्षा व्यक्त केली जात आहे.

सामान्य नागरिकांनी सावध राहण्याचे आवाहन

        एपीके फाईलच्या माध्यमातून मोबाईलचा ताबा घेऊन त्यानंतर व्हॉट्सॲप, संपर्क क्रमांक आणि इतर माहितीचा गैरवापर करण्याचा प्रकार अत्यंत गंभीर आहे. त्यामुळे नागरिकांनी मोबाईलवर आलेली कोणतीही अनोळखी एपीके फाईल डाऊनलोड करू नये. तसेच अनोळखी लिंकवर क्लिक करणे, संशयास्पद फाईल उघडणे किंवा कोणत्याही व्यक्तीच्या सांगण्यावरून मोबाईलमध्ये अनोळखी ॲप इन्स्टॉल करणे टाळावे. विशेषतः आरटीओ चालान, केवायसी अपडेट, बँक खाते, वीज बिल, सरकारी कागदपत्रे, पार्सल किंवा इतर शासकीय कामकाजाच्या नावाखाली आलेल्या लिंकची सत्यता तपासल्याशिवाय ती उघडू नये, असे आवाहन करण्यात आले आहे.

‘माझ्यासारखी फसवणूक इतरांची होऊ नये’

        सामाजिक कार्यकर्ते सचिन मंडल म्हणाले, “माझ्यासारखी फसवणूक इतर कोणत्याही निष्पाप आणि सामान्य नागरिकाची होऊ नये, याच सामाजिक भावनेतून मी पत्रकार परिषद घेऊन हा प्रकार समोर आणत आहे.” सायबर फसवणुकीचे प्रकार दिवसेंदिवस वेगवेगळ्या पद्धतीने समोर येत असल्याने नागरिकांनी जागरूक राहणे आवश्यक आहे. तसेच एपीके लिंकच्या माध्यमातून नागरिकांची आर्थिक फसवणूक करणाऱ्या सायबर गुन्हेगारांवर तातडीने कठोर कारवाई करून अशा प्रकारांना आळा घालावा, अशी मागणी सामाजिक कार्यकर्ते सचिन मंडल यांनी केली आहे.

#ChandrapurNews #Chandrapur #ChandrapurCyberCrime #CyberCrime #CyberFraud #CyberSecurity #APKLink #APKFraud #WhatsAppHacked #WhatsAppFraud #OnlineFraud #BankFraud #CyberScam #RTOChallanFraud #MaharashtraCyberCrime #ChandrapurPolice #RamnagarPolice #सायबरफसवणूक #एपीकेलिंक #व्हॉट्सॲपहॅक #चंद्रपूर #चंद्रपूरन्यूज #सायबरक्राईम #ऑनलाईनफसवणूक