बोधगया महाविहाराच्या मुक्ततेसाठी चंद्रपूरात भव्य शांतता मोर्चा

बोधगया महाविहाराच्या मुक्ततेसाठी चंद्रपूरात भव्य शांतता मोर्चा

वंचित महिला आघाडीचा ठाम पाठिंबा

आमचा विदर्भ - दीपक शर्मा

चंद्रपूर (दि. २४ एप्रिल २०२५) -

        बोधगया महाबोधी महाविहाराच्या बौद्ध समाजाकडे हस्तांतरित करण्याच्या मागणीसाठी चंद्रपूर शहरात 25 एप्रिल रोजी भव्य शांतता मोर्चा आयोजित करण्यात आला आहे. समता सैनिक दल, भारतीय बौद्ध महासभा आणि आंबेडकरी चळवळीतील विविध संघटनांच्या पुढाकाराने होणाऱ्या या मोर्चाला वंचित बहुजन आघाडीच्या महिला आघाडीने ठाम पाठिंबा दिला आहे. यासंदर्भात आयोजित पत्रकार परिषदेत वंचित बहुजन आघाडीच्या शहर अध्यक्षा तनुजा रायपूर यांनी माहिती दिली. त्यांनी सांगितले की, "बोधगया येथील महाबोधी महाविहार हे बौद्ध धर्माचे जागतिक महत्त्वाचे स्थळ असूनही अद्याप बौद्धांच्या ताब्यात नाही, ही खेदजनक बाब आहे. 1949 चा अन्यायकारक कायदा रद्द करून बौद्धांना व ऐतिहासिक सत्याला न्याय मिळावा यासाठी भारतीय भिक्खू संघ 12 फेब्रुवारीपासून देशव्यापी आंदोलन करत आहे." शांततामय पद्धतीने लढा देत असलेल्या या आंदोलनास जगभरातून पाठिंबा मिळत आहे. चंद्रपूर शहरातील सर्व आंबेडकरी, बौद्ध, आणि मानवतावादी नागरिकांनी यामध्ये सामील व्हावे, असे आवाहन रायपूर यांनी पत्रकार परिषदेद्वारे केले. मोर्चा 25 एप्रिल रोजी सकाळी 11 वाजता डॉ. बाबासाहेब आंबेडकर चौकातून सुरू होऊन जिल्हाधिकारी कार्यालयापर्यंत जाईल. पत्रकार परिषदेला मोनाली पाटील, इंदू डोंगरे, सुलभा चांदेकर, शोभा वाघमारे, कल्पना भासरकर, विश्रांत डोंगे, छाया वाघमारे, संदीप देव हे उपस्थित होते.