संपाच्या दुसऱ्या दिवशी उत्पादन व डीस्पॅच ठप्प

• संपाच्या दुसऱ्या दिवशी उत्पादन व डीस्पॅच ठप्प
• कामगार संघटनांनी पुकारलेल्या दोन दिवसीय संपाला कामगारांचा जोरदार पाठिंबा

आमचा विदर्भ - ब्युरो रिपोर्ट्स

राजुरा -

केंद्र सरकारच्या कामगार व शेतकरीविरोधी धोरणाच्या विरोधात देशातील दहा केंद्रीय कामगार संघटनांनी पुकारलेल्या दोन दिवसीय संपाच्या पहिल्या दिवशी कामगारांचा जोरदार पाठिंबा मिळाला. बल्लारपूर क्षेत्रातील वेकोलिच्या सर्व आठ कोळसा खाणीत आजही भारतीय मजदूर संघाच्या कार्यकर्त्याशिवाय कुणीही कामावर गेले नाहीत. यामुळे वेकोलिला कोट्यावधींचा फटका बसला असून कोळशाचे उत्पादन व डीस्पॅच पूर्णपणे ठप्प होते. आज संपात बल्लारपूर क्षेत्रातील सुमारे साडेतीन हजार वेकोलि कामगार सहभागी झाले होते. आजही काही कामगारांना व्यवस्थापनाने फोन करून बोलविण्याचा प्रयत्न केला, मात्र, कामगारांनी त्यांच्या प्रयत्नांना दाद दिली नाही. ठेकेदारी कामगार कामावर न आल्याने कुठलेही काम आजही खाण क्षेत्रात झाले नाही. वेकोलिच्या बल्लारपूर क्षेत्रातील सास्ती, गोवरी, पोवनी, धोपटाला, साखरी, गोवरी डीप या ओपनकास्ट आणि बल्लारपूर भूमिगत कोळसा खाणीत अंशी टक्के कामगार संपात उतरल्याने आणि प्रत्यक्ष उत्पादनात कार्य करणारे कामगार नसल्याने कोळसा व मातीचे उत्खनन पूर्णपणे बंद होते. त्यामुळे नाममात्र उत्पादन झाले. कामगारांनी जोरदार घोषणा देऊन केंद्र सरकारचा विरोध केला. दुसऱ्या पाळीतही कामगार हिरीरीने संपात सहभागी झाले होते. संपात इंटक चे आर. शंकरदास, विश्वास साळवे, सुधीर अमराज, आयटक चे दिलीप कनकुलवार, रामलू, एचएमएस चे अशोक चिवंडे, रामचंद्र यादव, सिटू चे गणपत कुडे, शेख जाहिद व शेकडो कामगार सहभागी झाले होते.