11,000 फूट उंचीवर फुटबॉल स्टेडियम

• 11,000 फूट उंचीवर फुटबॉल स्टेडियम
• लेहमध्ये दुर्गम भागात 'खेलो इंडिया खेलो'

आमचा विदर्भ - ब्युरो रिपोर्ट्स

शिमला -

नैसर्गिक सौंदर्याने नटलेल्या हिमाचल प्रदेशातील धर्मशाळेत जगातील सर्वश्रेष्ठ क्रिकेट स्टेडियमपैकी एक स्टेडियम तर आहेच शिवाय आता एक फुटबॉल स्टेडियमचाही या यादीत समावेश झाला आहे, जो केंद्रशासित लडाखमधील लेहमध्ये स्थापित करण्यात आले आहे. पर्वतरांगेत तयार करण्यात आलेले हे अतिशय सुंदर असे स्टेडियम लेहमधील स्पितुकमध्ये आहे. क्रीडामंत्री अनुराग ठाकूर यांनी लेहमधील स्पितुकमध्ये तयार करण्यात आलेल्या या सुंदर फुटबॉल स्टेडियमचे हवाई दृश्य शेअर केले. हे फुटबॉल स्टेडियम समुद्र सपाटीपासून 11000 फूट उंचीवर तयार करण्यात आले आहे.

पायाभूत सुविधा

अनुराग ठाकूर यांनी या स्टेडियमचे एक छायाचित्र ट्विटरवर शेअर केले. त्यात त्यांनी भारतात मैदानी खेळांसाठी पायाभूत सुविधा कशा तयार केल्या जात आहे आणि ते कसे सर्वोच्च स्तरावर पोहोचवले जात आहे याचा उल्लेख केला आहे. स्टेडियमचे मनमोहक दृश्य पाहून अनेकांना आश्चर्यही वाटले. सरकारने खेलो इंडिया कार्यक्रमांतर्गत लोकांना विविध क्रीडा प्रकारांच्या सुविधा विकसित करण्यासाठी पुढाकार घेतला असून त्याच उद्देशातून अतिशय दुर्गम अशा भागात हे स्टेडियम तयार करण्यात आले आहे.

लडाखच्या नागरिकांची स्वानपूर्ती

हे स्टेडियम आता तयार झाले असून लवकरच खेळाडूंसाठी खुले करण्यात येणार आहे. माजी केंद्रीय क्रीडामंत्री किरेन रिजुजू यांनी गेल्या वर्षी सप्टेंबर महिन्यात राज्यात फुटबॉलसाठी सिंथेटिक ट्रॅक आणि एस्ट्रोटर्फसह विविध क्रीडा सुविधांसाठी पायाभरणी केली होती. स्पितुक येथील नागरिक आणि हौशी फुटबॉल खेळाडू होण्याची लालसा असलेल्या मुलांसाठी हे स्टेडियम स्वप्नपूर्ती करणारेच आहे. स्थानिक जनतेसाठी हे स्टेडियम खुले झाल्यास आणि आणि फुटबॉल सामन्यांची मेजवानी सुरू झाल्यानंतर लडाखमध्ये त्यांच्या स्वप्नांना पंख फुटणार हे निश्चित.