- पावसाने शोध मोहिमेत अडथळा
- तरीही वनविभागाचे वाघिणीचा शोध घेण्यासाठी शर्थीचे प्रयत्न सुरू
वरोरा वनपरिक्षेत्राच्या सालोरी नियतक्षेत्रामध्ये २३ मे रोजी सायंकाळी एक वाघीण ट्रॅप कॅमेऱ्यात कैद झाली. त्यात तिच्या गळ्याभोवती फास असल्याने निदर्शनास आले. सुरुवातीस तो एका बाजूने नायलॉनचा फास असल्याचे दिसून आले. मात्र दुसऱ्या बाजूने वायर सारखा दिसतोय. त्यामुळे नेमक्या फासाचे स्वरूप स्पष्ट झाले नसले तरी लागलेला फास त्या वाघिणीसाठी धोक्याचा ठरू शकतो, त्यामुळे गंभीर बाब लक्षात घेता वनविभागाने त्वरित पावले उचलली. याबाबत वाघिणीला पकडून तिच्या गळ्यातील फास काढण्यासाठी प्रधान मुख्य वनसंरक्षक (वन्यजीव) यांच्याकडून तातडीची परवानगी घेण्यात आली. त्यानुसार या वाघिणीचा शोध २८ मेपासून सुरू झाला. वनविभागाचे पथक घटनास्थळावर वाघिणीसाठी शोध मोहीम राबवित आहे. मात्र मागील सहा दिवसांपासून ही वाघीण शोध पथकाला हुलकावणी देत आहे. तिच्या शोधासाठी जागोजागी ४५ ट्रॅप कॅमेरे लावण्यात आले आहेत. काही ठिकाणी मचाणी देखील उभारण्यात आल्या आहेत. वाघिणीला बेशुद्ध करून जेरबंद करण्यासाठी बेट देखील लावण्यात आले आहेत. या वाघिणीच्या काही ठिकाणी पाऊलखुणा आढळून येत आहेत. मंगळवारी तिच्या ताज्या पाऊलखुणा परिसरात आढळून आलेल्या असताना याच दरम्यान आलेल्या पावसाने मोठा अडथळा निर्माण झाला आहे. भर उन्हाळ्यात पाण्याच्या शोधार्थ वाघ बाहेर पडतात. पाणवठ्यापर्यंत पोहचतात, पण पाऊस आल्याने आतच पाणी सहज उपलब्ध झाल्याने ते बाहेर पडत नाही. त्यामुळे मोहिमेला तो मोठा अडसर ठरत असल्याची माहिती वनविभागाच्या वरिष्ठ सूत्रांनी दिली. वरोरा वनपरिक्षेत्राच्या आसपास भद्रावती वनपरिक्षेत्र असून ताडोबा-अंधारी व्याघ्र प्रकल्पातील बफर झोनचा भाग देखील येतो. त्या भागात या वाघिणीची हालचाल असू शकते. ती याच आसपासच्या परिसरातील टी-५५ वाघीण असल्याचे स्पष्ट झाले आहे. त्यामुळे शोधमोहिमेला गती आली आहे.
टिप्पणी पोस्ट करा
Thanks for your response, We will reply you soon, You haven't followed Aamcha Vidarbha yet, you follow Aamcha Vidarbha now.