रेतीतस्करीचे सहा ट्रॅक्टर जप्त

संग्रहित छायाचित्र

अनिल गंपावार - आमचा विदर्भ तालुका प्रतिनिधी

राजुरा -

सध्या रेतीतस्करांना सुगीचे दिवस आले आहेत. तालुक्यात मोठ्या प्रमाणात रेतीची चोरटी वाहतूक सुरु आहे. महसूल कर्मचाऱ्यांच्या दुर्लक्षतपणामुळे तस्करांना मोकळे रान मिळत आहे. धिडशीच्या तलाठ्याने पहाटे धिडशी व मारडा नाल्यावर धडक देत सहा ट्रॅक्टरवर कार्यवाही केली. सोबतच नदी पात्रातील खड्यांचे मोजमाप करून एक हजार ब्रास रेतीचा दंड वसूल करण्याचा अहवाल दिला. तालुक्यातील विहीरगाव, मूर्ती, विरूर, खांबाडा, बेरडी, टेम्बुरवाही, कापणगांव, सुमठाना, सास्ती, गोवरी, देवाडा आदी नाल्यावर रेती तस्करांचा धुमाकूळ सुरु असून मोठ्या प्रमाणात रेतीची तस्करी केली जात आहे. वर्धा नदीच्या धिडशी व मारडा घाटातून रेती उपसा होत असल्याचे लक्षात येताच तलाठी विनोद खोब्रागडे यांनी त्यावर पाळत ठेऊन पहाटे नदीपात्रात धडक देत सहा ट्रॅक्टरवर कार्यवाही केली. या धडक कार्यवाहीने रेती तस्करांचे धाबे दणाणले असून दबंग तलाठी विनोद खोब्रागडे यांची धास्ती आता रेतीतस्करांवर बसली आहे. 

वेकोलीच्या सर्व जीर्ण वसाहतीची तात्काळ दुरुस्ती करा