गावस्तरीय कोरोना दक्षता व लसीकरण समित्या होणार गठीत

• राजुरा तालुक्यातील ६५ ग्रामपंचायतीत होणार समित्या गठीत
• ग्रामीण भागात लसीकरणाबाबत जनजागृतीचा प्रशासनाचा उपक्रम

अनिल गंपावार - आमचा विदर्भ तालुका प्रतिनिधी

राजुरा -

कोरोना प्रतिबंधक लस घेतल्यास आरोग्यास धोका निर्माण होऊ शकतो तसेच लस घेण्यासाठी केंद्रांवर होत असलेल्या गर्दीत कोणी कोरोनाबाधित असल्यास आपल्यालाही कोरोनाची लागण होईल या भीतीने ग्रामीण भागातील नागरिक लस घेण्यासाठी केंद्रांवर येत नसल्याची बाब समोर आली होती. या पार्श्वभूमीवर प्रशासनाने ‘मिशन मोड’ ही लसीकरण मोहीम हाती घेतली. या मोहिमेअंतर्गत आता राजुरा तालुक्यातील ६५ ग्राम पंचायतीत गावस्तरीय कोरोना दक्षता व लसीकरण समित्या गठीत होणार आहे. 

कोविड १९ चा वाढता पादुर्भाव रोखण्याकरिता गावस्तरीय कोरोना दक्षता व लसीकरण समित्या गठीत करण्यात याव्या अश्या सूचना १६ मे रोजी मार्गदर्शक सूचना प्रशासनाकडून प्राप्त झाल्या. १ जून रोजी जिल्हाधिकारी चंद्रपूर यांची व्हिडीओ कॉन्फेरंस सभेतही यावर चर्चा झाली. त्यात गावस्तरीय कोरोना दक्षता व लसीकरण समित्या गठीत करून त्यात खालील प्रमाणे अधिकारी व कर्मचारी यांचा समावेश करण्याच्या सूचना देण्यात आल्या. 

या समितीत गावचा सरपंच-अध्यक्ष, ग्रामसेवक-सचिव, तलाठी, ग्रापं उपसरपंच, सर्व ग्रापं सदस्य, मुख्याध्यापक, पोलीस पाटील, अंगणवाडी व मदतनीस, कोतवाल, महिला बचत गटाचे अध्यक्ष व सचिव हे सर्व सदस्य राहणार असून उपरोक्त समितीस ग्रापं कार्यक्षेत्रामध्ये कोरोनाबाबत जनजागृती करणे, प्रतिबंधनात्मक क्षेत्राची देखभाल करणे तसेच जास्तीत जास्त नागरिकांचे लसीकरण करण्याबाबत जबाबदारी सोपविण्यात येणार आहे. या जनजागृती मोहिमेला नागरिकांचा उत्तम प्रतिसाद मिळेल व ग्रामीण भागातही आता लसीकरणाचा वेग वाढेल अशी असा विश्वास व्यक्त करण्यात येत आहे. 

ग्रामीण भागातील नागरिकांमध्ये लसीकरणासंदर्भात असलेला गैरसमज दूर व्हावा यासाठी प्रशासनाने हा उपक्रम राबविण्यास सुरुवात केली आहे. या माध्यमातून जनजागृती करण्यात येणार असून नक्कीच जनजागृती होणार आहे.
अमित महाजनवार - पंस विस्तार अधिकारी, राजुरा