त्या वेकोलि अधिकाऱ्यावर गुन्हा दाखल करा

• आम आदमी पार्टीची पोलिस अधीक्षक यांचेकडे मागणी

आमचा विदर्भ - ब्युरो रिपोर्ट्स

राजुरा -

राजुरा तालुक्यातील साखरी या गावातील प्रकल्पग्रस्त शेतकरी तुळशीराम घटे यांच्या कु. आशा या तरुण मुलीने वेकोलि अधिकाऱ्याने टॉर्चर केल्यामुळे आत्महत्या केली असून तिच्या वडिलांच्या मागणीनुसार वेकोली बल्लारपूर क्षेत्रातील नियोजन अधिकारी जी. पुलय्या यांचेवर आत्महत्येस प्रवृत्त करण्याचा गुन्हा दाखल करावा, अशी मागणी केली आहे. या घटनेतील दोषी अधिकाऱ्यावर तातडीने गुन्हा नोंदवून अटक करावी, अशी मागणी राजुरा तालुका आम आदमी पार्टीने केली आहे.

कु. आशा घटे हिला आपल्या कार्यालयात बोलावून अपमानास्पद भाषेचा वापर करून तिला वाईट वागणूक दिली. या अपमानास्पद वागणुकीचा आशाच्या मनावर गंभीर परिणाम झाल्यानेच तीने आत्महत्येसारखे टोकाचे पाऊल उचलले आहे, असा आरोप मृत आशाच्या वडीलांनी केलेला आहे. या तक्रारीची नोंद करण्यासाठी आशाचे वडील पोलिस स्टेशन, राजुरा येथे गेले असता त्यांच्या तक्रारीची दखल घेतली गेली नाही. वास्तविक तक्रारीची दखल घेऊन एफ.आय.आर. दाखल करणे अपेक्षित होते. असे न झाल्याने पोलिसांच्या संशयास्पद वागणुकीवर मात्र आता संशय घेतला जातो आहे.  

या घटनेचे गांभीर्य ओळखून आम आदमी पार्टी, शाखा राजुरा या घटनेचा तिव्र निषेध व्यक्त करते आहे. या घटनेची नि:पक्षपाती व सविस्तरपणे चौकशी व्हावी, यासाठी जवाबदार अधिकारी जी. पुलय्या यांचे निलंबन करून त्यांचेवर आत्महत्येस प्रवृत्त केल्याचा गुन्हा दाखल करावा अशी मागणी चंद्रपूर जिल्हा पोलीस अधीक्षक यांचेकडे आम आदमी पार्टी, शाखा राजुरा तर्फे करण्यात आली आहे.