एकात्मिक आरोग्यवर्धिनी समिती सदस्यांचा कढोली-देवाडा आरोग्य केंद्रांना दौरा

नियुक्तीनंतर तत्काळ ॲक्शन; सागर भटपलीवार, भूपेश मेश्राम यांची पाहणी

आमचा विदर्भ (वृत्तसेवा)

राजुरा (दि. ०९ जुलै २०२६) -

        राजुरा तालुक्यातील ग्रामीण भागातील आरोग्य सेवा अधिक सक्षम करण्याच्या उद्देशाने एकात्मिक आरोग्यवर्धिनी समितीचे नवनियुक्त सदस्य सागर भटपलीवार आणि भूपेश मेश्राम यांनी नियुक्तीनंतर तत्काळ कामाला सुरुवात केली आहे. गुरुवारी (९ जुलै) कढोली व देवाडा येथील प्राथमिक आरोग्य केंद्रांना भेट देत त्यांनी आरोग्य सेवांचा सविस्तर आढावा घेतला. या पाहणी दौऱ्यात सदस्यांनी प्राथमिक आरोग्य केंद्रांमधील वैद्यकीय सुविधा, डॉक्टर व कर्मचाऱ्यांची उपलब्धता, औषधसाठा, रुग्णांना दिल्या जाणाऱ्या सेवा तसेच कढोली प्राथमिक आरोग्य केंद्रांतर्गत येणाऱ्या सास्ती परिसरातील तीनही उपकेंद्रांच्या कामकाजाची माहिती घेतली. यावेळी आरोग्य कर्मचाऱ्यांशी संवाद साधून त्यांच्या अडचणी, आवश्यक मनुष्यबळ, मूलभूत सुविधा तसेच ग्रामीण भागातील आरोग्य सेवा अधिक परिणामकारक करण्यासाठी आवश्यक उपाययोजनांवर चर्चा करण्यात आली.

        नागरिकांना दर्जेदार, प्रभावी आणि वेळेत आरोग्य सेवा उपलब्ध व्हाव्यात, यासाठी आरोग्य केंद्रांतील समस्या प्रत्यक्ष पाहून त्या संबंधित वरिष्ठ अधिकाऱ्यांच्या निदर्शनास आणून देत त्यांचे निराकरण करण्यासाठी सातत्याने प्रयत्न करण्यात येतील, अशी भूमिका एकात्मिक आरोग्यवर्धिनी समितीचे सदस्य सागर भटपलीवार आणि भूपेश मेश्राम यांनी व्यक्त केली. या भेटीदरम्यान वैद्यकीय अधिकारी डॉ. प्रेरणा तोंडकुलवार (कढोली), वैद्यकीय अधिकारी डॉ. तृप्ती बेले (देवाडा) तसेच दोन्ही प्राथमिक आरोग्य केंद्रांतील आरोग्य कर्मचारी उपस्थित होते. त्यांनी आरोग्य केंद्रांच्या दैनंदिन कामकाजाची माहिती देत विविध अडचणी सदस्यांसमोर मांडल्या.

        नियुक्तीनंतर तातडीने प्रत्यक्ष क्षेत्रात उतरून आरोग्य यंत्रणेचा आढावा घेतल्यामुळे समिती सदस्यांच्या या उपक्रमाचे परिसरातील नागरिकांनी स्वागत केले आहे. ग्रामीण भागातील आरोग्य सेवा अधिक सक्षम, परिणामकारक आणि लोकाभिमुख करण्यासाठी अशा नियमित पाहणी दौऱ्यांची आवश्यकता असल्याचे मत नागरिकांनी व्यक्त केले.

#RajuraNews #Chandrapur #ChandrapurNews #HealthDepartment #PrimaryHealthCentre #PHC #RuralHealthcare #SagarBhatpaliwar #BhupeshMeshram #DevraoBhongale #MaharashtraNews #VidarbhaNews #PublicHealth #AamchaVidarbha