नाटोसारखा करार, इस्लामिक देशांची आघाडी; जागतिक राजकारणात खळबळ

सऊदीचा खजिना, पाकिस्तानची अणुशक्ती, तुर्किएची सेना; धोक्याची घंटा

आमचा विदर्भ - (वृत्तसेवा)

नवी दिल्ली (दि. 16 जानेवारी 2026) -

        जागतिक राजकारणात मोठी उलथापालथ घडवणाऱ्या घडामोडी सध्या मध्य पूर्व आणि दक्षिण आशियात वेग घेत आहेत. सऊदी अरब आणि पाकिस्तान यांच्यात झालेला डिफेन्स पॅक्ट आता नव्या टप्प्यावर पोहोचण्याची चिन्हे असून, या सामरिक करारात तुर्किए सामील होण्याच्या तयारीत असल्याची खळबळजनक माहिती समोर आली आहे. हा करार नाटोप्रमाणे कार्य करणार असून, कोणत्याही एका सदस्य राष्ट्रावर हल्ला झाल्यास तो संपूर्ण गटावर हल्ला मानला जाणार आहे. त्यामुळे या कराराला आंतरराष्ट्रीय स्तरावर ‘इस्लामिक नाटो’ किंवा ‘मुस्लिम नाटो’ असे संबोधले जात आहे.

        ब्लूमबर्गच्या अहवालानुसार सऊदी अरब, पाकिस्तान आणि तुर्किए यांच्यातील चर्चा अंतिम टप्प्यात पोहोचली असून, लवकरच अधिकृत घोषणा होण्याची शक्यता आहे. हा करार सामरिकदृष्ट्या अत्यंत महत्त्वाचा मानला जात आहे, कारण यामध्ये सऊदी अरबची प्रचंड आर्थिक ताकद, पाकिस्तानची अण्वस्त्र क्षमता आणि तुर्किएची अत्याधुनिक लष्करी शक्ती एकत्र येणार आहे. या संपूर्ण घडामोडींवर भारताकडून बारकाईने लक्ष ठेवले जात आहे.

        सप्टेंबर 2025 मध्ये सऊदी अरब आणि पाकिस्तान यांच्यात हा डिफेन्स पॅक्ट अधिकृतपणे साइन करण्यात आला होता. या करारात स्पष्ट नमूद करण्यात आले आहे की, कोणत्याही एका देशावर झालेला हल्ला हा दुसऱ्या देशावर झालेला हल्ला मानला जाईल. हा तरतूद नाटोच्या आर्टिकल 5 शी मिळतीजुळती असून, तुर्किए आधीपासूनच नाटोचा सदस्य असल्याने या संकल्पनेशी परिचित आहे. आता तुर्किए या करारात थेट सहभागी होण्यासाठी प्रयत्नशील आहे.

        तुर्किए या करारात सामील झाल्यास सऊदी अरब, पाकिस्तान आणि तुर्किए असा एक शक्तिशाली तीन देशांचा डिफेन्स ब्लॉक अस्तित्वात येऊ शकतो. ‘इस्लामिक नाटो’च्या रचनेत प्रत्येक देशाची भूमिका जवळपास निश्चित झालेली आहे. सऊदी अरब आर्थिक पाठबळ देणार असून, निधीची कमतरता भासू नये याची जबाबदारी त्याच्यावर असेल. पाकिस्तान आपले अण्वस्त्र प्रतिबंधक सामर्थ्य, बॅलिस्टिक क्षेपणास्त्रे आणि मोठ्या प्रमाणावर प्रशिक्षित सैन्य उपलब्ध करून देणार आहे. तुर्किए आपली लष्करी तज्ज्ञता, स्वदेशी संरक्षण उद्योग आणि प्रगत तंत्रज्ञान या करारात आणणार आहे.

         सध्या तुर्किए पाकिस्तानसाठी कॉर्वेट प्रकारच्या युद्धनौका तयार करत आहे. याशिवाय पाकिस्तानच्या एफ-16 लढाऊ विमानांचे आधुनिकीकरण तुर्किएने केले आहे. ड्रोन तंत्रज्ञानाच्या क्षेत्रातही तुर्किए, पाकिस्तान आणि सऊदी अरब यांच्यात सहकार्य सुरू आहे. याचबरोबर तुर्किएने पाकिस्तान आणि सऊदी अरबला आपल्या फिफ्थ जनरेशन फायटर जेट प्रकल्प ‘कान’मध्ये सहभागी होण्याचे अधिकृत आमंत्रण दिले आहे.

        हा संभाव्य ‘इस्लामिक नाटो’ अस्तित्वात आल्यास आशिया आणि मध्य पूर्वेतील सामरिक समीकरणे पूर्णपणे बदलू शकतात. भारत, अमेरिका तसेच पाश्चिमात्य देश या घडामोडीकडे संशयाने आणि गंभीरपणे पाहत असून, येणाऱ्या काळात या कराराचे जागतिक परिणाम दिसून येण्याची शक्यता नाकारता येत नाही.

#IslamicNATO #MiddleEastPolitics #SouthAsiaSecurity #SaudiPakistanDeal #TurkeyDefense #GlobalSecurity #Geopolitics #DefenseAlliance