रात्रीच्या चोरींमुळे रामपूरकर हैराण; सरपंचांच्या नेतृत्वात पोलिसांना निवेदन

रात्रीच्या चोरींमुळे रामपूरकर हैराण; सरपंचांच्या नेतृत्वात पोलिसांना निवेदन

गावात सुरक्षेचा प्रश्न ऐरणीवर; ग्रामपंचायतीची पोलिसांकडे धाव

आमचा विदर्भ - दीपक शर्मा

राजुरा (दि. १० जुलै २०२५) -

        राजुरा शहरालगत असलेल्या मौजा रामपूर येथील नागरिक गेल्या काही दिवसांपासून चोरीच्या वाढत्या घटनांमुळे हैराण झाले आहेत. विशेषतः रात्रीच्या वेळेस चोरीचे प्रमाण लक्षणीयरीत्या वाढले असल्याने गावकरी भयभीत आहेत. नागरिक रात्री घर कुलूप लावून बाहेरगावी किंवा कोणत्याही कार्यक्रमाकरिता जाण्यास घाबरत आहेत, परिणामी सामाजिक व वैयक्तिक आयुष्यात अडचणी निर्माण झाल्या आहेत. या पार्श्वभूमीवर रामपूर ग्रामपंचायतीकडून पोलीस प्रशासनाकडे रात्रीच्या गस्तीसाठी मागणी करण्यात आली आहे. यासंदर्भात राजुरा पोलीस स्टेशनमध्ये अधिकृत निवेदन देण्यात आले. या निवेदन देताना रामपूरच्या सरपंच निकिताताई रमेश झाडे, शिवसेना उपतालुकाप्रमुख रमेश झाडे, युवासेना तालुकाप्रमुख बंटी मालेकर, ग्रामपंचायत सदस्य अतुल खनके उपस्थित होते. ग्रामस्थांची ही मागणी योग्य असून पोलीस प्रशासनाने तातडीने लक्ष देत मौजा रामपूरमध्ये नियमित रात्रीची गस्त सुरू करावी, अशी आग्रही भूमिका ग्रामपंचायतीने मांडली आहे. रामपूरमधील वाढत्या चोरीच्या घटनांना आळा घालण्यासाठी हे महत्त्वाचे पाऊल ठरणार आहे.