जिवतीतील शेतकरी फार्मर आयडी अभावी योजनांपासून वंचित

जिवतीतील शेतकरी फार्मर आयडी अभावी योजनांपासून वंचित

शेतकऱ्यांसाठी पर्यायी व्यवस्था करा - भरत बिरादार यांची प्रशासनाकडे ठाम मागणी

आमचा विदर्भ - दीपक शर्मा

जिवती (दि. २० जून २०२५) -

        जिवती तालुक्यातील अनेक शेतकऱ्यांना अद्याप 'फार्मर आयडी' (शेतकरी ओळखपत्र) उपलब्ध न झाल्यामुळे महाराष्ट्र शासनाच्या विविध शेतीविषयक योजनांपासून ते वंचित राहत आहेत. ऑनलाइन सातबारा नसल्यामुळे फार्मर आयडी जनरेट होत नाही आणि त्यामुळे महाडीबीटी पोर्टलवर अर्ज करता येत नाही. यामुळे शेतकऱ्यांना आर्थिक मदतीपासून व तांत्रिक सहाय्यापासून वंचित राहावे लागत आहे.

        शिवसेना तालुका प्रमुख भरत बिरादार यांनी या संदर्भात प्रशासनाकडे ठोस मागणी केली असून, “जिवती तालुक्यातील हजारो शेतकऱ्यांना अद्याप फार्मर आयडी मिळालेला नाही. त्यामुळे कृषी विभागाच्या योजनांचा लाभ त्यांच्यापर्यंत पोहोचत नाही. अनेकांनी याआधी अर्ज केले असूनदेखील कागदपत्रे अपलोड करण्यासाठी अडथळे येत आहेत,” असे त्यांनी सांगितले. 

        भरत बिरादार यांनी पुढे सांगितले की, “फार्मर आयडी तयार होईपर्यंत तात्पुरत्या स्वरूपात पर्यायी व्यवस्था तयार करून शेतकऱ्यांना योजनांचा लाभ मिळवून द्यावा. ही समस्या गंभीर असून शासनाने याकडे तातडीने लक्ष द्यावे.”