"दहशतवादाविरोधातील लढ्यात भारतीय सेनेला सलाम''

"दहशतवादाविरोधातील लढ्यात भारतीय सेनेला सलाम''

ऑपरेशन सिंदूरच्या यशानंतर राजुरात देशभक्तीचा जल्लोष

आमचा विदर्भ - दीपक शर्मा

राजुरा (दि. 17 मे 2025) -

        ऑपरेशन सिंदूरच्या यशानंतर भारतीय सेनेच्या सन्मानार्थ शुक्रवारी शहरातून भव्य तिरंगा यात्रा काढली गेली. या दुचाकी यात्रेला राजुरा वासीयांचा उदंड प्रतिसाद मिळाला. भारत माता की जय आणि हम सेना के साथ है अशा जयघोषाने राजुरा शहर परिसर निनादून गेला.

ऑपरेशन सिंदूर - दहशतवादावर निर्णायक प्रहार

        पहलगाम येथील दहशतवादी हल्ल्यानंतर भारतीय लष्कराने राबवलेल्या 'ऑपरेशन सिंदूर'मुळे दहशतवादाचे कंबरडे मोडण्यात आले आहे. या शौर्यगाथेचा सन्मान म्हणून राजुरा शहर व परिसरातील नागरिकांनी तिरंगा यात्रेचे आयोजन केले. यात्रेच्या प्रारंभी माजी सैनिकांचा स्मृतिचिन्ह देऊन सन्मान करण्यात आला. यावेळी प्रमुख उपस्थितांमध्ये आमदार देवराव भोंगळे, तहसीलदार ओमप्रकाश गोंड, मुख्याधिकारी येमाजी धुमाळ, पोलीस निरीक्षक सुमित परतेकी, भाजपचे जिल्हा महामंत्री विवेक बोढे, माजी सैनिक गुरुदास कोपुलवार, सुरेश गीरटकर, शंकर मेंगरे, गणेश दुबे, सुरेश तोडसाम, तुकाराम मडावी, निशा मोहुर्ले आणि भोयर यांचा सहभाग होता.

        भारत लॉज चौकातून सुरू झालेली यात्रा रामपुर आणि चुनाळा येथून फिरून भारत लॉज चौकात समाप्त झाली. या यात्रेत विविध सामाजिक संघटनांनी आणि नागरिकांनी उत्स्फूर्त सहभाग घेतला.