तालुकास्तरीय मुलींच्या कबड्डी स्पर्धेत जिप भोयगाव शाळा अव्वल

मुलींचा संघ जिल्हास्तरावर

आमचा विदर्भ - धनराजसिंग शेखावत, तालुका प्रतिनिधी

गडचांदूर (दि. 27 सप्टेंबर 2023) - 

        मागील वर्षीप्रमाणे यावर्षी सुद्धा 14 वर्षाखालील गटात जिल्हा परिषद उच्च प्राथमिक शाळा भोयगाव येथील मुलींनी कबड्डी स्पर्धेत तालुकास्तरावर प्रथम क्रमांक मिळवीत यश प्राप्त केले. मागील वर्षी जिल्हास्तरावर सेमिफायनल पर्यंत या मुलींना बाजी मारता आली होती व जिल्हास्तरावर तृतीय क्रमांक प्राप्त केला होता. या वर्षी जिल्हास्तरावर यश प्राप्त करण्यासाठी विद्यार्थिनींनी अधिक मेहनत घेत आहेत. तसेच यावर्षी अंशिका विठ्ठल ठाकरे या विद्यार्थिनीने 400 मीटर धावणे स्पर्धेत यश मिळवत जिल्हास्तरावर आपले स्थान निश्चित केलेले आहे. (Girls team at district level)

        मागील वर्षीप्रमाणे यावर्षी सुद्धा या यशाच्या मागे सिहाचा वाटा अंबुजा सिमेंट फाऊंडेशन उपरवाही यांचा असून क्रीडाक्षेत्रात ग्रामीण भागातील विद्यार्थी यांचे करियर घडविण्यासाठी विशेष मेहनत घेत असल्याचे दिसून येते. पुढे होणाऱ्या जिल्हास्तरीय स्पर्धेकरिता व विद्यार्थी यांच्या कामगिरी व यशाबद्दल पंचायत समिती कोरपना चे गटशिक्षणाधिकारी सचिनकुमार मालवी, शाळा व्यवस्थापन समिती अध्यक्ष सुभाष पिंपळशेंडे, अंबुजा सिमेंट फाऊंडेशन उपरवाही येथील प्रकल्प समन्वयक सरोज अंबागडे भोयगाव केंद्राचे केंद्रप्रमुख जांभुलकर, तालुका क्रीडा अधिकारी प्रमोद वाघाडे, शाळेचे मुख्याध्यापक धनराज सोनवणे यांनी अभिनंदन केले व पुढील वाटचालीस शुभेच्छा दिल्या.

        विद्यार्थ्यांच्या कामगिरी साठी शाळेचे क्रीडाशिक्षक निलेश कुमरे, विषय शिक्षक, गुणवंता खोरगडे स.शी., कु मंजुषा पवार स.शी., अंबुजा सिमेंट फाऊंडेशनचे अनिकेत दुर्गे यांनी परिश्रम घेतले. (aamcha vidarbha)