उपजिल्हा रुग्णालयात "आयुष्यमान भवः" साप्ताहिक आरोग्य मेळावा संपन्न

माजी नगराध्यक्ष अरुण धोटे यांच्या हस्ते निक्षय मित्र व टीबी चॅम्पियन रुग्णांचा सन्मान

आमचा विदर्भ - दीपक शर्मा द्वारे

राजुरा (दि. १६ सप्टेंबर २०२३) -

        स्थानिक उपजिल्हा रुग्णालयात आयुष्यमान भवः अंतर्गत साप्ताहिक आरोग्य मेळाव्याचे उद्घाटन माजी नगराध्यक्ष अरुण धोटे यांच्या शुभहस्ते फित कापून करण्यात आले. यावेळी वैद्यकीय अधिक्षक डाॅ. व्हि.एम. डाखोळे, तालुका वैद्यकीय अधिकारी डॉ. प्रकाश नगराळे व रुग्णालयातील सर्व वैद्यकीय अधिकारी व कर्मचारी उपस्थित होते. ((Nikshay Mitra and TB Champion patients honored by former Mayor Arun Dhote))

        ‘आयुष्यमान भव’ मोहिमेचा शुभारंभ झाला असून नागरिकांनी या मोहिमेत सहभागी होवून आरोग्यविषयक सेवा-सुविधांचा लाभ घ्यावा असे आवाहन करण्यात आले आहे. ''आयुष्मान भव'' हा कार्यक्रम ३१ डिसेंबरपर्यंत चालणार आहे. या कालावधीत आयुष्यमान आपल्या दारी, स्वच्छता अभियान, आयुष्यमान मेळावा, रक्तदान शिबिर, अवयवदान जागृती मोहीम, आयुष्मान सभा, अंगणवाडी व प्राथमिक शाळेतील मुलांची तपासणी करण्यात येणार आहे. हे कार्यक्रम उपकेंद्र, आरोग्य वर्धिनी केंद्र व प्राथमिक आरोग्य केंद्र यांच्यामार्फत नियोजन करून लाभार्थ्यांना सेवा पुरविण्यात येणार आहेत. या सेवांचा लाभ तालुक्यातील लोकांनी घेण्याचे आवाहन करण्यात आले आहे. 

        आयुष्यमान भवः कार्यक्रमाअंतर्गत समृध्दी नागरी सहकारी पतसंस्थेचे सचिव मसुर अहमद, आदर्श नागरी सहकारी पतसंस्थेचे अध्यक्ष सुदर्शन दाचेवार यांचा निक्षय मित्र म्हणून तर (TB) क्षयरोगावर मात करणाऱ्या रुग्णांचा टीबी चॅम्पियन म्हणून माजी नगराध्यक्ष अरुण धोटे (arun dhote) यांच्या हस्ते शाल, श्रीफळ व स्मृतिचिन्ह देऊन सन्मान करण्यात आला. यावेळी वैद्यकीय अधिकारी, कर्मचारी व रुग्णाचे नातेवाईक उपस्थित होते.

        कार्यक्रमाचे संचालन नागरे ब्रदर, टीबी कार्यक्रमाचे व्यवस्थापन उमेश डहाळे, वरिष्ठ प्रयोगशाळा पर्यवेक्षक, संजय मंथनवार व औषधोपचार पर्यवेक्षक यांनी केले. (rajura) (aamcha vidarbha)