संतप्त नागरिकांनी रस्त्यावर पेटविले टायर

संतप्त नागरिकांनी रस्त्यावर पेटविले टायर

राजुरा - गोवारी मार्गावर धुळीमुळे नागरिकांचा आक्रोश

आमचा विदर्भ - न्यूज नेटवर्क

राजुरा -

राजुरा-रामपूरगोवरी मार्गाचे काम मागील दीड वर्षांपासून कासवगतीने सुरू असून, मातीमुळे धुळीचे लोंढे उडत आहे. याच त्रासाला कंटाळून रामपूर येथील संतप्त नागरिकांनी रविवारी सकाळी अकरा वाजता माता मंदिर देवस्थानाजवळ रस्त्यावर टायर जाळून निषेध केला आहे.

राजुरा-रामपूर-गोवरी रस्ता हा नागरिकांसाठी कर्दनकाळ ठरला आहे. पावसाच्या दिवसात दररोज या मार्गावर वाहतुकीचा खोळंबा होत आहे. या मार्गावरून दररोज शाळेत ये-जा करणारे विद्यार्थी, शिक्षक कर्मचारी, वेकोलि कामगार व तालुक्याच्या ठिकाणी कामानिमित्त शेकडो नागरिकांची वर्दळ असते. मात्र कासवगतीने सुरू असलेल्या रस्त्याच्या कामामुळे व संबंधित विभागाच्या दुर्लक्षितपणामुळे धुळीचे लोंढे उडत असल्याने पायदळ जाणारे विद्यार्थी, बसने प्रवास करणारे विद्यार्थी, शिक्षक कर्मचारी वेळेवर शाळेत कार्यलयात पोहोचू शकत नाही, धुळीमुळे नागरिकांना जीव मुठीत घेऊन प्रवास करावा लागत आहे. रस्त्याच्या आजूबाजूने वस्तीने असलेल्या घरात धुळीचे थर साचत असल्याने लहान बालकांपासून तर मोठ्यांच्या आरोग्याला धोका निर्माण झाला असल्याने नागरिकांमध्ये रोष दिसून येत आहे.

रस्ता बंद घटनेची माहिती राजुरा पोलिसांना मिळताच पोलीस उपनिरीक्षक प्रशांत साखरे यांनी आंदोलनस्थळी जाऊन वाहतूक सुरळीत सुरू केली. यावेळी टायर कोणी जाळले हे माहीत झाले नसले तरी पोलिसांसमोर नागरिकांनी रस्त्यांबद्दल रोष व्यक्त करीत तत्काळ रस्ता दुरुस्ती करणे, दररोज रस्त्यावर पाणी मारण्याची मागणी केली. यानंतर वाहतूक सुरळीत सुरू करण्यात आली.