कॉलेजच्या इमारतीवरुन उडी घेत विद्यार्थिनीचा आत्महत्येचा प्रयत्न

कॉलेजच्या इमारतीवरुन उडी घेत विद्यार्थिनीचा आत्महत्येचा प्रयत्न

शिवसैनिकांची कॉलेजच्या प्राचार्यांना मारहाण

चंद्रपूरमधील सोमय्या कॉलेजमधील घटना

आमचा विदर्भ - न्यूज नेटवर्क

चंद्रपूर -

कॉलेजच्या इमारतीवरून उडी घेऊन विद्यार्थिनीने आत्महत्या करण्याचा प्रयत्न केल्याचा धक्कादायक प्रकार चंद्रपूर शहरातील सोमय्या पॉलिटेक्निक कॉलेजमध्ये घडला आहे. बारावीचे शिक्षण घेणारी विद्यार्थिनी नीट परीक्षेची तयारी करीत होती. प्रकरण दडपणण्याच्या प्रयत्न करणाऱ्या संस्थेविरोधात शिवसेनेने आक्रमकता दाखवून महाविद्यालयाच्या प्राचार्यांना मारहाण केली असल्याचा प्रकार समोर आला आहे.

शहरातील नामवंत शिक्षण संस्था असलेल्या सोमय्या कॉलेजच्या इमारतीवरून विद्यार्थिनीने उडी घेत आत्महत्येचा प्रयत्न केल्याची धक्कादायक घटना घडल्याने एकच खळबळ उडाली. शनिवारी दुपारी सोमय्या कॉलेज व पॉलिटेक्निक येथील बारावीत शिकणारी विद्यार्थिनी निट परीक्षेची तयारी करत होती. तिने महाविद्यालयाच्या दुसऱ्या मजल्यावरून उडी घेतली.

जखमी अवस्थेत असलेल्या विद्यार्थिनीला शहरातील एका खाजगी रुग्णालयात उपचारासाठी हलविण्यात आले. मात्र, प्रकृती चिंताजनक असल्याने या विद्यार्थिनीला नागपूर उपचारासाठी नेण्यात आले. दरम्यान, नागपूर येथील खाजगी रुग्णालयात उपचार सुरू असल्याची माहिती मिळत आहे. घटनेची माहिती रामनगर पोलिसांना मिळताच पोलीसांनी घटनास्थळ गाठले. त्यानंतर संबंधित प्रकाराची माहिती शिवसैनिकांना देखील मिळताच शिवसैनिक सोमय्या कॉलेजमध्ये दाखल झाले. या संपूर्ण घटनेला कॉलेजच्या प्राचार्यांना जबाबदार ठरवून आणि कॉलेज हे प्रकरण दाबण्याचा प्रयत्न करत असल्याचं म्हणत शिवसैनिकांनी मारहाण केली.