बल्लारपूर कॉलरीतील कॅम्प परिसरात पावसाचे पाणी घरात घुसले

बल्लारपूर कॉलरीतील कॅम्प परिसरात पावसाचे पाणी घरात घुसले

रहिवाश्यांचे लाखोंचे नुकसान

आमचा विदर्भ - न्यूज नेटवर्क

बल्लारपूर -

बल्लारपूरच्या सरदार पटेल वॉर्डात असलेल्या कॅम्प परिसरात गेल्या चाळीस वर्षांपासून पावसाचे पाणी शिरत असल्यामुळे नागरिकांचे नुकसान होत आहे. मिळालेल्या माहितीनुसार, रेल्वे साईडिंग आणि कॅम्प परिसर यांच्यामध्ये नाला वाहत होता. मात्र वेकोलिच्या अधिकाऱ्यांच्या सांगण्यावरून नाला बुजवून रस्ता करून पाण्याचा प्रवाह अडकला होता. याबाबत आठ महिन्यांपूर्वी वेकोलिच्या अधिकाऱ्यांकडे तक्रार करूनही त्यांनी या प्रकरणाकडे लक्ष दिले नसल्याचा आरोप परिसरातील नागरिकांनी केला आहे.

रविवारी रात्री अकरा वाजताच्या सुमारास अचानक पाऊस सुरू झाला, घरांमध्ये पाणी शिरू लागले आणि घराच्या आत नदीसारखी परिस्थिती पाहून लोकांमध्ये घबराट पसरली, सुमारे तीन ते चार फूट उंच पाणी घरात तुंबले. या वस्तीत सुमारे दोनशे ते तीनशे लोक राहतात. यामध्ये सखल भागातील सुमारे पंचवीस घरांमध्ये रात्रभर पाणी तुंबले. लोकांचे टीव्ही, फ्रीज, कुलर, कपाट, वॉशिंग मशीन, रेशनचे साहित्य आदी पाण्यात भिजल्याने नुकसान झाले आहे. वृत्त प्रकाशित होईपर्यंत तरी कोणतीही सुविधा लोकांसाठी उपलब्ध झालेली नव्हती. वेकोलिच्या अधिकाऱ्याच्या सांगण्यावरून जेसीबी मशीन लावून नाल्यात बांधलेला रस्ता फोडून पाणी काढले आहे. लोकांनी प्रशासनाकडे मदतीचे आवाहन केले असून वेकोलि अधिकाऱ्यांनी यावर मौन बाळगले आहे. जेसीबी लावून पाणी काढणाऱ्या ठेकेदाराच्या प्रतिनिधीने सांगितले कि आठ महिन्यांपूर्वी वेकोलि अधिकाऱ्याच्या आदेशावरून नाल्यात माती टाकण्यात आली होती, आज त्यांच्या आदेशावरून रस्ता फोडून पाण्याचा निचरा करण्यात आला आहे.