कॅथलिक चर्चला ८७ वर्षे पूर्ण

• कॅथलिक चर्चला ८७ वर्षे पूर्ण

एच.एन. (राजेश) अरोरा - आमचा विदर्भ प्रतिनिधी

बल्लारपूर -

बल्लारपूर-चंद्रपूर मार्गाला लागून असलेले बल्लारपूर येथील कॅथलिक चर्च विदर्भातील महत्त्वपूर्ण आणि जुन्या चर्च मधील एक आहे. 1934 साली हे चर्च बांधण्यात आले. त्यावेळचे चंद्रपूर जिल्ह्यातील हे एकमेव चर्च होते. चंद्रपूर, गडचिरोली आणि वर्धा हे तीन जिल्हे मिळून बनलेल्या ख्रिस्त धर्म प्रांताचे हे मुख्यालय होते. धार्मिक व सेवाभावी कार्याचे नियोजन येथून केले जाते. कॅथलिक चर्चला यंदा 87 वर्ष पूर्ण झाले आहे. स्वातंत्र्यपूर्व काळात या परिसरात रेल्वेमार्गाचे काम 1930 च्या दरम्यान सुरू झाले. त्याकरिता रेल्वेच्या अधिकाऱ्यांना बल्लारपूर परिसरात मुक्कामाला राहावे लागत होते. त्यादरम्यान हे चर्च बांधण्यात आले. त्या काळात जंगलात गावाच्या शेवटच्या टोकाला हे चर्च होते. गावाचा विस्तार झाला आणि आज हे सर्वात जुने चर्च शहराच्या मध्यभागी आले आहे. काळानुरूप या चर्चचे वेळोवेळी मुख्य इमारतीचा गाभा (ढाचा) ठेवून नूतनीकरण व सौंदर्गीकरण करण्यात आले. चर्चच्या दर्शनी भागाच्या वर प्रभू येशूची आकर्षक प्रतिमा (शिल्प) आहे. काही वर्षापूर्वी ममत्वाचे प्रतीक असलेल्या माता मरियम यांचे शिल्प चर्चला लागून दर्शनी भागात बसविले. प्रभू येशूच्या शांतता व प्रमाचा संदेशानुसार समाज कार्यरत असून, हे कार्य या धर्म प्रांताद्वारे कायम सुरू राहील, असे बिशफ एफ्रेम नरीकुलम यांनी सांगितले.