बाळाला विकल्याची धक्कादायक घटना

• बाळाला विकल्याची धक्कादायक घटना
• नवजात बालकेही सुरक्षित नाहीत
• बाळाला विकणारी टोळी अटकेत

आमचा विदर्भ - ब्युरो रिपोर्ट्स

चंद्रपूर -

एचआयव्ही झाल्याची भीती दाखवून दहा दिवसाच्या बाळाला संस्थेच्या सूपुर्त करण्याचा बहाण्याने 2 लाख 75 हजारांना बाळाला विकल्याची धक्कादायक घटना चंद्रपुरात उघडकीस आली आहे. पिडीत महिलेच्या तक्रारीवरून पोलिसांनी सहा आरोपींना अटक केलीय. या घटनेने चंद्रपूरात लहान बालकेही सुरक्षित नसल्याचं समोर आलंय.

चंद्रपूर येथील शासकीय रुग्णालयात 13 जानेवारीला पीडित महिलेने एका गोंडस बाळाला जन्म दिला. घराशेजारी राहणारी मिना राजु चौधरी ही महिला तिला भेटायला वारंवार रुग्णालयात जायची. सुट्टी झाल्यावर पीडित महिलेला मिना चौधरी हिने घरी न नेता लोहारा येथील लोटस हॉटेल येथे घेऊन गेली. तुला HIV झाला आहे. तू बाळाला सोबत ठेवले तर बाळ सुध्दा बाधित होईल, अशी भीती दाखविली. बाळाला सुरक्षित ठेवायचे असल्यास नागपूर येथील माझ्या ओळखीच्या संस्थेकडे बाळाला सूपुर्त करु. काही दिवस ते बाळाचा सांभाळ करतील, असं शेजारणीने पीडितेला सांगितलं.

भीतीपोटी पीडितेने आपल्या बाळाला नागपूरमधून आलेल्या तीन महिलांच्या स्वाधिन केले. 18 जानेवारीला मीना चौधरी ही पिडीत महिलेच्या घरी गेली. तिने पीडितेला 49 हजार रूपये दिले. आपलेच बाळ सांभाळण्याचे आपल्यालाच पैसे कसे मिळतील? अशी शंका तीला आली. बाळाला भेटण्याचा तिने आग्रह धरला. मात्र मिना चौधरीकडून तिला उडवाउडवीची उत्तरे मिळाली. त्यामुळे पीडितेला शंका आली.

पिडीत महिलेने अप्पर पोलीस अधिक्षक अतुल कुलकर्णी यांच्याशी संपर्क साधला. घडलेला घटनाक्रम सांगितला. रामनगर पोलीस स्टेशन येथे तक्रार दाखल केली. स्थानिक गुन्हे शाखेचे पोलीस निरीक्षक बाळासाहेब खाडे यांनी मीना चौधरी हिला ताब्यात घेतले. चौकशीत धक्कादायक प्रकार पुढे आला.

मीना चौधरी हिने प्रियकर जाबिर रफिक शेख व उर्जुग सलीम सय्यद याच्या मदतीने नागपुरातील वनिता कावडे, पुजा शाहु, शालिनी मोडक यांना 2 लाख 75 हजार रुपयात बाळ विकल्याची कबुली दिली. नागपुरातील वनिता कावडे, पुजा शाहु, शालिनी मोडक यांना ताब्यात घेत नवजात बाळाची चौकशी पोलीसांनी केली.

चंद्रपूर येथील स्मिता मानकर या महिलेकडे बाळ ठेवल्याची माहिती समोर आली आहे. पोलिसांनी बाळाला ताब्यात घेतले आहे. बाळाची वैद्यकीय तपासणी करण्यासाठी जिल्हा सामान्य रूग्णालयात दाखल करण्यात आले. पोलिसांनी आता मीना चौधरी, जाबिर रफिक शेख, अजुम सलीम सय्यद, वनिता मुलचंद कावडे, पुजा सुरेंद्र शाहु, शालिनी गोपाल मोडक यांना अटक केली आहे. पुढील तपास रामनगर पोलीस करीत आहे.