राजुरा शहरातील स्मशानभूमी - कब्रस्थान यांच्यात जागेचा वाद; हिंदू, आदिवासी व बौद्ध स्मशानभूमीची जागा हडप करण्याचा आरोप

• राजुरा शहरातील स्मशानभूमी - कब्रस्थान यांच्यात जागेचा वाद
• हिंदू, आदिवासी व बौद्ध स्मशानभूमीची जागा हडप करण्याचा आरोप 

आमचा विदर्भ - ब्युरो रिपोर्ट्स

राजुरा -

राजुरा शहरातील इंदिरानगर येथील भूमापन क्रमांक 149 च्या दोन हेक्टर जागेवर हिंदू, आदिवासी व बौद्ध समाजाच्या लोकांची स्मशानभूमी असून त्याचे बाजूला मुस्लिम लोकांचे कब्रस्थान आहे. परंतु आता कब्रस्थानाच्या कुंपणाचे बांधकाम करण्यासाठी हिंदू, बौद्ध व आदिवासी लोकांच्या स्मशानभूमीत अतिक्रमण करण्याचा प्रयत्न करीत आहेत. मात्र येथील नागरिकांनी याला जोरदार विरोध केला असून अखेर हे काम बंद पाडले आहे. या प्रकरणाची तातडीने दखल घेऊन हे प्रकरण गंभीर होण्यापूर्वी चंद्रपूर जिल्हाधिकारी आणि पोलीस अधीक्षक यांनी तातडीने कार्यवाही करून न्याय द्यावा, अशी मागणी इंदिरानगर येथील रहिवाश्यांनी पत्रकार परिषदेत केली.

नप सत्ताधाऱ्यांनी घटनास्थळी येऊन येथे उपस्थित हिंदू, बौद्ध व आदिवासी लोकांना धमकाविले आणि गुन्हे दाखल करविण्याची धमकी दिली, असा स्पष्ट आरोपही या नागरिकांनी केला आहे. दरम्यान तहसीलदार यांनी घटनास्थळी भेट देऊन पाहणी केली. या प्रकरणाची तक्रार शेकडो  नागरिकांच्या स्वाक्षरीने आमदार, वरिष्ठ अधिकारी आणि राजकिय पदाधिकारी यांचेकडे करण्यात आली आहे. विशेष म्हणजे नगर पालिकेचे पदाधिकारी आणि अधिकारी हे अन्याय करीत असल्याचा आरोप नागरिकांनी केला आहे.

दिनांक 27 नोव्हेंबरला नगर पालिकेने इंदिरानगर वॉर्डात सभा घेऊन स्मशानभूमीचे बांधकाम करणार असल्याचे सांगून प्रत्यक्ष जागेवर जाऊन कामाचे लेआऊट केले. मात्र दुसर्‍या दिवशी येऊन वेगळे लेआऊट करीत हिंदू, आदिवासी व बौद्ध स्मशानभूमीच्या जागेला कब्जात घेण्याचा आणि रस्ताही याच जागेतून काढण्याचा प्रयत्न केला. त्यांनी हिंदू, बौध्द व आदीवासी समाजासाठी असलेल्या स्मशानभूमीची ७९ फुट जागा बेकायदेशीरपणे रस्त्यासाठी घेवून जेसीबी चालविली. त्यात हिंदु, बौध्द व आदीवासी समाजाच्या मृत व्यक्तीच्या समाधी जेसीबीने तोडून साफ केल्या. यामुळे येथे तणाव निर्माण झाला. समाधीची विंटबना करुन सामाजिक वातावरण दूषित करून सामाजिक तणाव निर्माण करण्याचा खुलेआम प्रयत्न झाला. यानंतर तहसीलदार आणि पोलीस अधिकाऱ्यांनी येवून काम थांबविले. नगर पालिकेने या जागेवर मुस्लिम समाजाच्या कब्रस्थानासाठी मोठ्या जागेवर निशाणी करून हिंदू, आदिवासी व बौद्धांच्या स्मशानच्या जागेतून रस्ता देण्यात आला. यामुळे स्मशानभूमी साठी अत्यंत कमी जागा राहिली.

हिंदू, आदिवासी व बौद्धांच्या स्मशानभूमीत हा प्रकार घडला असतानाही त्यांनी शांतता बाळगत न्याय देण्याची मागणी केली. नगर परिषद सत्ताधाऱ्यांना सर्व माहिती दिल्यावर त्यांनी मस्जिद कमेटीच्या लोकांचीच बाजू घेतली. आता शासनाने तातडीने या प्रकरणाची दखल घेऊन हिंदू स्मशानभूमीसाठी न्याय द्यावा, अशी मागणी सुरेश मेश्राम, देवानंद चांदुरकर, महेंद्र बुरडकर, सूरज ताटपल्लीवार, नितीन सिडाम, महेश थुल यांनी पत्रकार परिषदेत केली.