लाचखोर तहसीलदाराला एक दिवसाची पोलीस कोठडी

• लाचखोर तहसीलदाराला एक दिवसाची पोलीस कोठडी
• २५ हजाराची केली होती मागणी

शशी ठक्कर - आमचा विदर्भ प्रतिनिधी

चंद्रपूर -

माती उत्खनन व वाहतूक करण्याचा परवान्यासाठी 25 हजार रूपयांची मागणी करणाऱ्या जिल्हयातील भद्रावती येथील तहसीलदार नीलेश निवृत्ती खटके, (36) यांना लाचलुतपत प्रतिबंधक विभाग, नागपूरच्या पथकाने शनिवारी रंगेहाथ पकडले. त्यांच्या विरुद्ध लाचलुचपत प्रतिबंधक कायदा अंतर्गत गुन्हा नोंद केला. आज जिल्हा व सत्र न्यायालय, चंद्रपूर यांनी तहसीलदार खटके यांना एक दिवसाची पोलिस कोठडी सुनावली.

भद्रावती तहसील अंतर्गत चिरादेवी पो. सुठाना येथील रहिवासी तक्रारदार यांचा वीटाभट्टीचा व्यवसाय आहे. त्यांनी स्वमालकीच्या शेतीतून 300 ब्रास माती उत्खननासंदर्भात रॉयल्टीसाठी 88,256 रुपयांचा भरणा केला. ऑनलाइन पावती घेऊन तक्रारदार भद्रावती तहसील कार्यालयात गेले असता तहसीलदार खटके यांनी तक्रारदाराकडे 25 हजार रुपयांची मागणी केली. त्यांची पैसे देण्याची मुळीच इच्छा नव्हती. त्यांनी याबाबत नागपूर येथील लाचलुचपत प्रतिबंधक विभागाकडे तक्रार केली. नागपूर लाचलुचपत प्रतिबंधक विभागाच्या उप अधिक्षक योगिता चाफले यांच्या नेतृत्वाखाली सापळा रचला. आणि शनिवारी तहसीलदार खटके यांना 25 हजार रूपयांची लाच स्वीकारताना रंगेहाथ पकडले. त्याच्या विरोधात भद्रावती पोलिस स्टेशनमध्ये गुन्हा नोंदविण्यात आला. रविवारी जिल्हा व सत्र न्यायालय, चंद्रपूर न्यायालयाने तहसीलदार खटके यांना एक दिवसाची पोलिस कोठडी सुनावली. या प्रकरणात सरकारी वकील अॅड. गोविंद उराडे यांनी बाजू मांडली.