साखरी येथे पहिल्याच दिवशी १०० नागरिकांनी घेतली लस

• लसीकरणासाठी साखरी ग्रामस्थांचा उत्स्फूर्त प्रतिसाद
• साखरीत लसीकरण केंद्र सुरु व्हावे यासाठी अँड.प्रशांत घरोटे यांनी केला होता पाठपुरावा

अनिल गंपावार - आमचा विदर्भ तालुका प्रतिनिधी
राजुरा -
भाजपा तालुका महामंत्री इंजि. अँड.प्रशांत घरोटे यांच्या पुढाकाराने साखरी गावात कोरोना लसीकरण केंद्र मंजूर झाले असून यामुळे नागरिकांची लसीकरणासाठी गावातच सोय झाली आहे. या लसीकरण केंद्रात साखरी व परिसरातील गावातील नागरिकांनी लसीकरण करून घेण्याचे आवाहन आरोग्य विभागाने तसेच भाजपा तालुका महामंत्री इंजि.अँड.प्रशांत घरोटे यांनी केले होते. 

माजी केंद्रीय गृह राज्यमंत्री हंसराज अहिर यांच्या कढोली प्राथमिक आरोग्य केंद्र येथील भेटीदरम्यान साखरी गावात कोरोना मृत्यू संख्या जास्त असल्याबाबत व गावाकडे विशेष लक्ष देण्याबाबत सूचना देण्यात आल्या होत्या. याच दरम्यान साखरी येथे लसीकरणाची सोय नसल्याने नागरिकांना गोवरी किंवा कढोली येथे जावे लागत होते. तद्वतच प्रशांत घरोटे यांनी आरोग्य अधिकारी यांच्या समक्ष साखरी येथे लसीकरण केंद्र उपलब्ध करून देण्याची मागणी करण्यात आली होती. माजी केंद्रीय गृह राज्यमंत्री हंसराज अहिर यांनी साखरी येथे लसीकरण केंद्र मंजूर करून देण्याचा सूचना दिल्या होत्या, त्यानुसार वैद्यकीय अधिकारी यांनी साखरी येथे लसीकरण केंद्र मंजूर करत असल्याबाबत आश्वस्त केले. आज दि. ३ जून पासून लसीकरणाला सुरुवात झाली. 

जिल्हा परिषद शाळा साखरी येथे लसीकरण केंद्राचे उद्घाटन व लसीकरण संपन्न झाले. सरपंच भाऊजी कोडापे, उपसरपंच सुरेखा गोरे, कढोली येथील येथील वैद्यकीय अधिकारी डॉ. विपीन ओडेला, भाजपा तालुका महामंत्री इंजि.अँड.प्रशांत घरोटे यांच्या प्रमुख उपस्थितीत लसीकरण केंद्राचे उदघाटन झाले. यावेळी ग्रामसेवक घाटे, मोतिराम गोरे, सदस्य अमोल घटे, सुदर्शन बोबडे, कालिचरण काटवले, शंकर गोरे प्रामुख्याने उपस्थित होते. याप्रसंगी ४५ वर्ष वयावरील  १०० नागरिकांनी लसीकरणाचा लाभ घेतला. आता गावातच लसीकरणाची सोय उपलब्ध झाल्यामुळे गावातील व परिसरातील नागरिकांनी समाधान व्यक्त केले आहे.