'हेल्पिंग हॅन्ड' संस्थेचा स्तुत्य उपक्रम

• रूग्ण सेवेनंतर आता गरजू महिलेला ताडपत्रीची मदत

अनंता गोखरे - आमचा विदर्भ प्रतिनिधी

राजुरा -

राजुरा शहरातील हेल्पीग हॅन्ड या महिलांच्या सामाजिक संस्थेने कोरोना काळात शहरातील अनेक गरजू लोकांना त्यांच्या आवश्यकतेनुसार मदत केली. याच अनुषंगाने पावसात घर गळून बेजार झालेल्या एका विधवा महिलेला घरावर टाकण्यासाठी ताडपत्री देऊन मदत केली. गरजू लोकांना त्यांच्या आवश्यकतेनुसार नियोजनबद्ध मदत करणाऱ्या या सेवाभावी संस्थेच्या कार्यकर्त्यांचे कौतुक करण्यात येत आहे.

सोमनाथपूर वॉर्डात श्रीमती पुष्पा इरकूलवार या महिलेचे झोपडीवजा घर आहे. पावसात तिचे घर पूर्णपणे गळू लागले. मात्र मजुरी करून आपले जीवनयापन करताना गळणाऱ्या घरातच आपल्या लहान मुलीसह ही विधवा महिला राहात होती. याची माहिती हेल्पीग हॅन्ड संस्थेच्या कृतीका सोनटक्के यांना मिळाली. त्यांनी तातडीने आपल्या समूहातील सदस्यांना माहिती दिली. संकटमोचन हनुमान मंदिर प्रांगणात झालेल्या कार्यक्रमात श्रीमती ईरकुलवार यांना ही ताडपत्री देण्यात आली. 

या कार्यक्रमात कृतीका सोनटक्के, स्नेहा चांडक, अमृता धोटे, वज्रमाला बदकमवार, सुनिता जमदाडे, रजनी शर्मा, स्वरुपा झंवर, भावना रागीट, संतोष झंवर, लता चांडक, रचना नावंदर, कंचन चांडक, रमा आयटलावार, सीमा कलसे इत्यादी सदस्या उपस्थित होत्या.‌

हेल्पीग हॅन्ड संस्थेने कोरोना काळात अडचणीत असलेल्या अनेक बाधित रुग्ण व त्यांच्या कुटुंबीयांना जेवणाचे डब्बे पुरवून मदत केली. आता शासनाकडून पाठ्य पुस्तकाचा लाभ न मिळणार्‍या गरीब विद्यार्थी - विद्यार्थिनींना पाठ्यपुस्तके व नोटबूक सह शालेय साहित्य वितरित करण्याचा मानस संस्थेच्या पदाधिकाऱ्यांनी व्यक्त केला आहे.