कोरोना संसर्गामुळे अडीच महिन्यांपासून बंद असलेले ताडोब्यातील पर्यटन शुक्रवारपासून झाले सुरू

• कोअर झोनमधील सहाही दरवाजे आले उघडण्यात

आमचा विदर्भ - ब्युरो रिपोर्ट्स

चंद्रपूर -

करोनासंसर्गामुळे अडीच महिन्यांपासून बंद असलेले ताडोब्यातील पर्यटन शुक्रवारपासून सुरू झाले. कोअर झोनमधील सहाही दरवाजे उघडण्यात आले. पहिल्या दिवशी सकाळच्या सुमारास सुमारे ४५ पर्यटकांची नोंद झाली. येत्या १ जुलैपासून पावसाळी सुट्टी लागणार असल्याने या पर्यटनाचा केवळ सहा दिवसच लाभ घेता येणार आहे. बफरमधील पर्यटनाचा मात्र पावसाळ्यातही लाभ घेता येणार असल्याचे प्रकल्प व्यवस्थापनाने स्पष्ट केले आहे.

राज्यात करोनाची दुसरी लाट आली असताना सुरक्षिततेचा उपाय म्हणून १५ एप्रिलपासून वन्यजीव पर्यटन बंद करण्यात आले. आता संसर्ग कमी होऊ लागल्याने राज्यातील जनजीवन पूर्वपदावर आले आहे. अशावेळी व्याघ्रपर्यटन पूर्ववत सुरू करावे, अशा आशयाचे पत्र 'एनटीसीए' आणि राज्याच्या प्रधान मुख्य वनसंरक्षक (वन्यजीव) यांनी गुरुवारी सायंकाळी जारी केले. ही बाब पर्यटकांना दिलासा देणारी ठरली. ताडोबा व्यवस्थापनाने यासंदर्भात पत्रक जारी केले आहे.

ताडोब्यातील सहा प्रवेशद्वारावरून दिवसाच्या दोन टप्प्यात ठरवून दिलेल्या क्षमतेनुसार पर्यटक गाड्यांना अनुमती दिली जाणार आहे. आता थेट प्रवेशद्वारावर जाऊन पर्यंटकांना बुकिंग करावे लागणार आहे. १ जुलैपासून नियमाप्रमाणे पावसाळ्यात ताडोबा कोअर क्षेत्र तीन महिने बंद राहणार आहे. मात्र बफरमध्ये मान्सून पर्यटन सुरू राहणार असल्याची माहिती ताडोबा-अंधारी व्याघ्रप्रकल्पाचे क्षेत्र संचालक डॉ. जितेंद्र रामगावकर यांनी 'मटा'शी बोलताना दिली. मान्सून पर्यटन पावसाळ्यात रस्त्यांची एकूण स्थिती कशी राहते त्यावर अवलंबून राहणार असल्याची पुष्टी त्यांनी जोडली. बफर क्षेत्रातील सफारी सुरू करण्यासाठी नियमांसह स्वतंत्र आदेश काढला जाणार आहे. मास्क, सॅनिटाझर, थर्मल स्क्रिनिंग बंधनकारक करण्यात आले आहे.

सुट्टीच्या दिवशीही पर्यटन

ताडोब्यातील कोअर झोनचे सहाही दरवाजे शुक्रवारपासून पर्यटकांसाठी खुले झाले. पहिल्या दिवशी अनेकांना माहिती नसल्याने सफारीचा बेत आखू शकले नाही. पण, काही पर्यटक थेट गेटवर सकाळी पोहचत सफारीला गेले. कोअर झोनमधील कोलारा व मोहाली येथून प्रत्येकी पाच गाड्या गेल्याची माहिती सूत्रांनी दिली. मंगळवारी ताडोबा कोअरला आठवडी सुट्टी असते. मात्र प्रकल्पाला सुट्ट्या लागत असल्याने मंगळवारीही सफारी सुरू राहणार आहे.

कच्च्या रस्त्यांमुळे प्रकल्प राहणार बंद

पावसाळ्यात विदर्भातील नवेगाव-नागझिरा, बोर हे दोन्ही व्याघ्रप्रकल्प अंतर्गत कच्च्या रस्त्यांमुळे बंद राहण्याची शक्यता आहे. उर्वरित पेंच, मेळघाट अंशतः सुरू राहणार असल्याचे स्पष्ट संकेत आहेत.