तेंदु संकलन करण्याकरिता गेलेल्या महिलेवर वाघाने हल्ला

• महिला गंभीर जखमी ; सावली तालुक्यातील घटना
• वाघाची दहशत कायमच....

आमचा विदर्भ - ब्युरो रिपोर्ट्स

सावली -

तेंदु संकलन करण्याकरिता गेलेल्या महिलेवर वाघाने हल्ला करून गंभीर जखमी केल्याची घटना आज दि.18 रोजी सकाळच्या सुमारास घडली. सदर महिला सावली तालुक्यातील गेवरा येथील रहिवासी असून शकुंतला दिवाकर चौधरी (50) असे जखमी महिलेचे नाव आहे.

सध्या ग्रामीण भागात तेंदु संकलन करण्याचा हंगाम सुरू आहे. गावातील महिला सोबत सदर महिला तेंदु संकलन करण्याकरिता गोसेखुर्दच्या मुख्य नहराकडे गेली होती. त्याच परिसरात दबा धरून बसलेल्या वाघाने महिलेवर अचानक हल्ला केला. सोबतीला असणाऱ्या महिलांनी आरडाओरड करून वाघाला हाकलून लावले व सदर महिलेची वाघाच्या तावडीतून सुटका केली. घटनेची माहिती वनविभागाला देण्यात आली. वनविभागाने घटनास्थळ गाठून चौकशी करून जखमी महिलेचा अंतरगाव येथील आरोग्य केंद्रात प्राथमिक उपचार करून पुढील उपचाराकरिता गडचिरोली येथील सामान्य रुग्णालयात भरती करण्यात आले आहे.