विदर्भवादी १ मे महाराष्ट्र दिनी घरावर लावणार काळे झेंडे

• घरावर काळे झेंडे लावून राज्य सरकारचा निषेध करण्याचे विदर्भ राज्य आंदोलन समितीचे आवाहन

आयशा - आमचा विदर्भ प्रतिनिधी

नागपूर -

कोरोनाचे भीषण संकट आणि लॉकडाउनमुळे येत्या १ मे रोजी महाराष्ट्र दिनी विदर्भवादी कार्यकर्त्यांनी घरावर काळे झेंडे लावून राज्य सरकारचा निषेध करावा, असे आवाहन विदर्भ राज्य आंदोलन समितीने केले आहे.

समितीने दरवर्षी प्रमाणे यंदाही महाराष्ट्र दिन काळा दिवस पाळण्याचे जाहीर केले. वैदर्भीयांच्या भावना राज्यकर्त्यांपर्यंत पोहचण्यासाठी घरावर झेंडा तसेच दंडावर काळी पट्टी बांधून समाजमाध्यमातून छायाचित्र व्हायरल करण्यात येणार आहे. समितीच्यावतीने सातत्याने आंदोलन चालले आहे. वर्षभरापासून करोनामुळे सर्व ठप्प झाले असले तरी, वेगळ्या राज्यासाठी कधी ऑनलाइन तर, कधी ऑफलाइन आंदोलन करून सरकारचे लक्ष वेधण्याचा प्रयत्न केला जात आहे.

कोरोनाचा उद्रेक लक्षात घेता संकट आणखी वाढण्याचा धोका आहे. गंभीर स्थितीचे भान ठेवून कार्यकर्त्यांनी लॉकडाउनच्या सूचना व नियमांचे पालन करावे. रस्त्यावर न येता घरातच बसून सरकारपर्यंत मागणी पोहोचवावी, असे समितीचे मुख्य संयोजक राम नेवले यांनी म्हटले आहे.

महामारीच्या भयंकर संकटात विदर्भ असतानाही ठाकरे सरकारचे पूर्ण लक्ष मुंबई, पुणे आणि नाशिकपर्यंतच आहे. वैदर्भीयांना वाऱ्यावर सोडले आहे. नियोजनशून्य कारभारामुळे रुग्णालयात बेड्स नाही, ऑक्सिजन, व्हेंटिलेटर्सअभावी असंख्य रुग्णांचे प्राण गेले. रेमडेसिव्हिर पुरवठ्यात भेदभाव केला जात आहे. या भागातील प्रश्न सोडवणे तर, दूर रुग्णांना योग्य उपचार मिळाले, याकडेही लक्ष नाही. भयंकर स्थितीत देखील सत्तारुढ व विरोधी पक्षाचे राजकारण चालले असल्याने वेगळ्या राज्यासाठी नागरिकांनी सज्ज व्हावे, असे आवाहनही राम नेवले यांनी केले आहे.