निष्काळजीपणामुळे रुग्ण दगावल्याचा आरोप

• शाह हाॅस्पिटलमध्ये तोडफोड ; नातेवाईक संतप्त

रक्षक पाटील - आमचा विदर्भ प्रतिनिधी

यवतमाळ -

येथील कोविड रुग्णालय असलेल्या शाह हाॅस्पिटलमध्ये उपचारात चालढकल केल्यामुळे बाधित महिला रुग्ण दगावली. असा आरोप करीत संतप्त नातेवाईकांनी रुग्णालयाची तोडफोड केली. ही गंभीर घटना मंगळवारी रात्री नऊ वाजताच्या सुमारास घडली. घाटंजी तालुक्यातील शिवणी येथील एका महिला  कोरोना बाधित रुग्णाला शाह हाॅस्पिटलमध्ये चिंताजनक स्थितीत दाखल करण्यात आले होते. दरम्यान नर्स स्टाफने रुग्णाचे ऑक्सिजन मास्क काढल्याने व उपचार सुरू करण्यास चालढकल केल्याने रुग्ण दगावला. असा आरोप करीत मयत रुग्णाच्या संतप्त नातेवाईकांनी रुग्णालयात गोंधळ सुरू केला. दरम्यान रुग्णालयाच्या काचांसह संगणकाची तोडफोड सुरू केली. यामध्ये नोंदणी कक्ष. ऑक्सिजन सिलेंडर कक्षासह पॅथॉलॉजी आणि मेडिकल स्टोअर मध्ये देखील या नातेवाईकांनी तोडफोड करून रोष व्यक्त केला. या संपूर्ण गोंधळामुळे रुग्णालयात कर्मचारी व रूग्णाच्या नातेवाईकांमध्ये पळापळ सुरू झाली. घटनेची माहिती मिळताच अवधूतवाडी पोलीस घटनास्थळी धाव घेत तोडफोड करणाऱ्या दोन संतप्त युवकांना ताब्यात घेतले. तसेच त्यांची समजुत काढण्याचा प्रयत्न केला. या प्रकरणी डॉक्टर शाह यांनी अशाच प्रकारची तक्रार दिली नाही परंतु या घटनेमुळे जिल्ह्याच्या वैद्यकीय क्षेत्रात एकच खळबळ उडाली आहे.