वेकोलिच्या गोवरी कोळसा खाणीतून डिझेल चोरी

अनिल गंपावार - आमचा विदर्भ तालुका प्रतिनिधी

राजुरा -

वेकोलिच्या बल्लारपूर क्षेत्रातील खदानीत अपघात, डिझेल व सुट्या साहित्यांची चोरी नित्याचीच बाब झाली आहे. दि. १४ च्या मध्यरात्री गोवरी उपक्षेत्रातील गोवरी १ खाणीतील लोडींग मशीन आणि डोझर मशिनीतून चोरटयांनी अंदाजे किंमत १६ हजार रुपयाचे २०० लिटर डिझेल चोरटयांनी चोरून नेले. डिझेल चोरी झाल्याचे लक्षात येताच ड्युटीवर असणाऱ्या सुरक्षा रक्षक संतोष घाटे यांनी याबाबत वेकोलिच्या वरिष्ठ सुरक्षा अधिकाऱ्यांना माहिती देत पोलिसात तक्रार दिली. अधिक तपास पोलीस करीत आहे. 

वेकोलिच्या खदानीत डिझेल चोरी नित्याचीच बाब झाली असून वेकोलि प्रशासन सुरक्षेविषयी उदासीन का याबाबत प्रश्नचिन्ह निर्माण झाले आहे. बाहेरून येणाऱ्या अज्ञात चोरांना चोरी करण्याचे ठिकाण आणि तेथे पोहचण्याचे रस्ते कसे माहित होतात, याबाबतही शंका व्यक्त केली जात आहे.