वाघाच्या हल्ल्यात वृद्ध शेतकऱ्याचा मृत्यू

• राजुरा तालुक्यातील नवेगाव गावांतील महिन्यातील दुसरी घटना
• वाघाच्या हल्यात आता पर्यंत ६ लोक मृत्युमुखी
• वाचा सविस्तर....

अविनाश रामटेके - प्रतिनिधी

विरूर स्टेशन - राजुरा -

मध्य चांदा वन विभागा अंतर्गत येत असलेल्या विरूर वन परिक्षेत्रातील नियत क्षेत्र कक्ष क्रमांक १४५ मध्ये नवेगाव येथील गोविंदा भीमराव मडावी 70 वर्षे हा जंगलालगत असलेल्या आपल्या शेतात शेतकामाकरिता गेला असता तिथे दबा धरून असलेल्या वाघाने त्याच्यावर हल्ला करून त्याला जागीच ठार मारल्याची घटना आज साडेतीन च्या सुमारास घडली. 

तसेच नवेगाव लगत असलेल्या भेंडाला येथील वेटी या शेतकऱ्याची जनावर फस्त केल्याची घटना आज सकाळी घडली, सतत होत असलेल्या अशा घटनेमुळे परिसरात भीतीचे वतावरण निर्माण झाले आहे, याअगोदर एका महिन्यांपूर्वी नवेगाव येथील एका शेतकऱ्याचा वाघाने जीव घेतला होता त्यावेळी  परिसरातील नागरिक वनविभागा विषयी संतप्त रोष व्यक्त करून वनविभागाला निवेदन देऊन वाघाचा बंदोबस्त करण्याची मागणी केली होती. त्यावेळी 

वनविभागाने पंधरा दिवसांत वाघाचा बंदोबस्त करू अशी आश्वासन दिले मात्र पुन्हा या घटनेत भर पडल्याने  शेतीचे संगोपन व रक्षण करणे हे शेतकऱ्यांना कठीण झाले आहे. सदर घटनेची माहिती मिळताच विरुर चे ठाणेदार कृष्णकुमार तिवारी, वडतकर व वनविभागा चे अधिकारी घटनास्थळी पोहचून घटनेचा पंचनामा केला. 

विशेष म्हणजे मागील सहा महिण्यापासून राजुरा व विरूर वन परिक्षेत्रात वाघाने धुमाकूळ घातला असून आतापर्यंत ६ लोकांना नाहक जीव गमवावा लागला आहे. या भागात वाघाने प्रचंड दहशत निर्माण केली असून वन विभागातील कर्मचारीही त्याला जेरबंद करण्याकरिता काचोटीने प्रयन्त करीत आहेत. मात्र सदर वाघ वनकर्मचाऱ्यांच्या तावडीत येत नसून लोकांचा नाहक जीव घेत आहे. यामुळे नागरिकांमध्ये तीव्र संताप व्यक्त होत असून आता त्या वाघाला ठार माराच हि मागणी जोर धरू लागली आहे.