"चार महिने उजेड, मग अंधाराचा ठेका; स्ट्रीट लाईटची 'गारंटी' संपली?"

"स्ट्रीट लाईट सुट्टीवर, वाहनचालक, नागरिक देवाच्या भरोशावर!"

आमचा विदर्भ वृत्त सेवा

राजुरा (दि. ०४ जून २०२६) -

        राजुरा शहरातील पंचायत समितीजवळील संविधान चौक ते नाका क्रमांक तीन या मुख्य मार्गावरील स्ट्रीट लाईट सध्या "अंधाराशी मैत्री" करून बसल्याचे चित्र आहे. काही महिन्यांपूर्वी मोठ्या उत्साहात लावण्यात आलेले हे दिवे आता उजेड देण्याऐवजी फक्त खांबांची शोभा वाढवत असल्याची चर्चा नागरिकांमध्ये रंगू लागली आहे.

        अवघ्या चार-पाच महिन्यांतच पाच-सहा खांबांवरील दिव्यांनी "स्वेच्छानिवृत्ती" स्वीकारली. त्यानंतर उरलेल्या दिव्यांनीही बहुधा "एकजूटता" दाखवत मागील पंधरा दिवसांपासून सामूहिक संप पुकारला आहे. त्यामुळे संविधान चौक ते नाका क्रमांक तीन हा रस्ता आता अधिकृतपणे "अंधार गल्ली" म्हणून ओळखला जाऊ लागला आहे. 

        सध्या पावसाळ्यामुळे रस्त्यावर अनेक ठिकाणी खड्डे पडले असून काही ठिकाणी डांबर उंचावले आहे. मात्र अंधारामुळे खड्डा कुठे संपतो आणि रस्ता कुठे सुरू होतो, हे समजण्यासाठी वाहनचालकांना बहुधा "दिव्यदृष्टी"ची गरज भासत आहे. विशेषतः दुचाकीस्वार रोज रात्री घरी सुखरूप पोहोचल्यानंतर "आजही वाचलो रे देवा!" असा आनंद साजरा करत असावेत, अशी परिस्थिती निर्माण झाली आहे.

        नागरिकांमध्ये तर आता अशीही चर्चा सुरू आहे की, हे स्ट्रीट लाईट उजेडासाठी नव्हे तर निवडणुकीपर्यंतच बसवले होते काय? कारण निवडणुकीनंतर काही महिन्यांतच दिव्यांनी विश्रांती घेतलेली दिसत आहे.

        रस्त्यावरील अंधार पाहून चंद्र आणि वाहनांच्या हेडलाईटवरच प्रशासनाने उजेडाची जबाबदारी सोपवली आहे का, असा उपरोधिक सवाल नागरिक विचारत आहेत. लोकप्रतिनिधी आणि संबंधित प्रशासनाने या स्ट्रीट लाईटची तातडीने दुरुस्ती करून नागरिकांना अंधारातून मुक्त करावे, अशी मागणी जोर धरत आहे.

टीप : हा लेख व्यंगात्मक शैलीत लिहिलेला असून सार्वजनिक समस्येकडे लक्ष वेधण्याचा उद्देश आहे.