धनगर आरक्षण - खासदारांनी ढोल वाजवून वेधले लक्ष

• सात दशकां पासून नाही सुटला राज्यातील धनगर समाजाच्या आरक्षणाचा तिढा
• राज्यकर्त्यांचे लक्ष वेधण्यासाठी खासदार डॉ. विकास महात्मे व अन्य नेते व कार्यकर्त्यांनी राज्यभरात ठिकठिकाणी वाजविले ढोल

आयशा - प्रतिनिधी

नागपूर -

राज्यातील धनगर समाजाच्या आरक्षणाचा तिढा सात दशकांपासून सुटलेला नाही. राज्यकर्त्यांचे लक्ष वेधण्यासाठी खासदार डॉ. विकास महात्मे यांनी ठाणे येथे, तर अन्य नेते व कार्यकर्त्यांनी राज्यभरात ठिकठिकाणी ढोल वाजवले.

'धनगर' ऐवजी 'धनगड' लिहिल्याने अनुसूचित जमातीच्या आरक्षणापासून समाज वंचित आहे. दऱ्याखोऱ्यातील मेंढपाळ धनगर अतिशय हलाखीचे जीवन जगत आहेत. अनुसूचित जमातीचे आरक्षण मिळावे, यासाठी खासदार महात्मे यांनी केलेल्या आवाहनास उत्स्फूर्त प्रतिसाद लाभला. करोनाच्या या संकट काळातही राज्यभर आंदोलन करण्यात आले. राज्यभरातील सर्व संघटना, समित्यांनी एकत्र येऊन तालुका व जिल्हा पातळीवर निदर्शने केली.

विकास महात्मे यांनी ठाण्याच्या जिल्हाधिकारी कार्यालयासमोर ढोल वाजवला. यावेळी आमदार निरंजन डावखरे, संजय केळकर, भाजपच्या भटक्या विमुक्त आघाडीचे प्रमुख नरेंद्र पवार यांनीही ढोल वाजवले. आंदोलनात ज्ञानेश्वर परदेशी, संतोष आव्हाड, अशोक शेळके, राजू बर्गे, निहारिका गोंदले, विशाखा खताळ, डॉ. अरुण गावडे, राजेंद्र पांढरे, अक्षय मासाळ, भास्कर यमगर, दीपक कुरकुंडे सहभागी झाले होते.