लाखो अनुयायांचे प्रेरणास्थळ दीक्षाभूमीवर यंदा सोहळा साधा !

• यंदाचा ६४वा धम्मचक्र प्रवर्तनदिन सोहळा मोजक्या व्यक्तींच्या उपस्थितीत साधेपणाने होणार

आयशा - प्रतिनिधी

नागपूर -

देश-विदेशातील लाखो अनुयायांचे प्रेरणास्थळ असलेल्या दीक्षाभूमीवरील यंदाचा ६४वा धम्मचक्र प्रवर्तनदिन सोहळा मोजक्या व्यक्तींच्या उपस्थितीत साधेपणाने होणार आहे. त्यानुसार सर्व कार्यक्रम रद्द करण्यात आले आहेत. करोनासंकटामुळे हा निर्णय घेण्यात आला आहे, असे डॉ. बाबासाहेब आंबेडकर दीक्षाभूमी स्मारक समितीने शुक्रवारी जाहीर केले.

धम्मचक्र प्रवर्तन दिना निमित्त आवश्यक ते विधी स्मारक समितीच्या मोजक्या सदस्यांच्या उपस्थितीत पार पडतील. दीक्षाभूमीवर लाखोंच्या संख्येत बौद्ध अनुयायी दरवर्षी येत असतात. ही गर्दी लक्षात घेता यंदा सरकारने दिलेल्या दिशानिर्देशांचे पालन करणे शक्य होणार नाही. सर्वांच्या आरोग्याची काळजी घेणे स्मारक समितीचे कर्तव्य आहे. सर्व बांधवांचे आरोग्य धोक्यात टाकणे उचित नाही. तेव्हा तारखेनुसार १४ ऑक्टोबर रोजी तसेच विजयादशमी २५ ऑक्टोबर रोजी दीक्षाभूमीवर न येता घरीच बुद्धवंदना तसेच भारतरत्न डॉ. बाबासाहेब आंबेडकर यांना अभिवादन करावे, असे आवाहन समितीने केले आहे. पुढील महिन्यात पत्रपरिषद घेऊन धम्मचक्रप्रवर्तन दिन सोहळा रद्द झाल्याची माहिती पुन्हा एकदा दिली जाईल, असे स्मारक समितीचे सचिव डॉ. सुधीर एस. फुलझेले यांनी कळविले आहे.