विरूर स्टेशन रस्त्याची पाहणी

विरूर स्टेशन रस्त्याची पाहणी

HAM योजनेअंतर्गत नूतनीकरणाचा प्रस्ताव सादर होणार

आमचा विदर्भ - दीपक शर्मा 

चंद्रपूर (दि. २५ जुलै २०२५) -

        विरूर स्टेशन परिसरातील मुख्य रस्त्याची दुरवस्था आणि नागरिकांच्या तक्रारींची दखल घेत सार्वजनिक बांधकाम विभागाचे डेप्युटी इंजिनियर अभिजीत पुल्लावार यांनी आज घटनास्थळी भेट देऊन पाहणी केली. नागरिकांनी थेट संवाद साधून नव्याने रस्ता तयार करण्याची मागणी केली. पाहणी दरम्यान वाहतुकीस अडथळा निर्माण करणारे खड्डे, अपघाताचे धोके, पाण्याची साचलेली स्थिती यांसंदर्भात नागरिकांनी नाराजी व्यक्त केली. अभिजीत पुल्लावार यांनी रस्ता HAM योजनेअंतर्गत नुतनीकरणासाठी प्रस्ताव शासनाकडे पाठवण्याचे आश्वासन दिले.

        या वेळी भारतीय जनता पक्षाचे शहरप्रमुख भीमराव पाला, युवक काँग्रेसचे अध्यक्ष प्रविण चिडे, प्रसारमाध्यम प्रतिनिधी फिरोज सय्यद तसेच सामाजिक कार्यकर्ते आणि नागरिक मोठ्या संख्येने उपस्थित होते. रस्ता सुधारला तर वाहतूक सुलभ होईल आणि परिसरातील विकासास गती मिळेल, अशी अपेक्षा व्यक्त होत आहे. मात्र प्रत्यक्ष काम लवकर सुरू न झाल्यास तीव्र आंदोलनाचा इशारा नागरिकांनी दिला आहे.