सिग्नल बसविले; पण झेब्रा क्रॉसिंगच नाही!

पंचायत समिती चौकातील वाहतूक व्यवस्थेवर प्रश्नचिन्ह

नगरसेवक भूपेश रमेश मेश्राम व सागर भट्टपलीवार यांचे मुख्याधिकाऱ्यांना निवेदन

आमचा विदर्भ - वृत्तसेवा

राजुरा (दि. १४ जुलै २०२६) -

       राजुरा शहरातील पंचायत समिती चौकात नगर परिषदेमार्फत वाहतूक सिग्नल बसविण्यात आले असले तरी झेब्रा क्रॉसिंग, स्टॉप लाईन, लेन मार्किंग तसेच वाहतूक मार्गदर्शक सूचना फलकांची व्यवस्था अद्याप करण्यात आलेली नसल्याने वाहतूक व्यवस्थेवर प्रश्नचिन्ह निर्माण झाले आहे. अपूर्ण सुविधांमुळे वाहनचालक आणि पादचाऱ्यांमध्ये संभ्रमाचे वातावरण असून चौकात वारंवार वाहतूक कोंडी होत असल्याची तक्रार नागरिकांकडून करण्यात येत आहे.

        पंचायत समिती चौक हा राजुरा शहरातील अत्यंत वर्दळीचा चौक असून येथून दररोज शेकडो वाहने तसेच मोठ्या संख्येने पादचारी ये-जा करतात. विशेषतः शाळकरी विद्यार्थी, ज्येष्ठ नागरिक, महिला तसेच सर्वसामान्य नागरिकांना रस्ता ओलांडताना मोठ्या अडचणींचा सामना करावा लागत आहे. झेब्रा क्रॉसिंग आणि स्टॉप लाईन नसल्याने वाहनचालकांना सिग्नलनुसार वाहन कुठे थांबवायचे, याबाबत स्पष्टता नसल्याने अपघाताचा धोका वाढत असल्याचे नागरिकांचे म्हणणे आहे. वाहतूक सिग्नल बसविण्याचा निर्णय स्वागतार्ह असला तरी त्यासोबत आवश्यक असलेल्या मूलभूत सुविधा उपलब्ध करून देण्यात आलेल्या नाहीत. परिणामी सिग्नलचा अपेक्षित फायदा नागरिकांना मिळत नसल्याची भावना व्यक्त होत आहे.

        या पार्श्वभूमीवर नगरसेवक भूपेश रमेश मेश्राम व सागर भट्टपलीवार यांनी नगर परिषदेचे मुख्याधिकारी यांना निवेदन सादर करून पंचायत समिती चौकात झेब्रा क्रॉसिंग, स्टॉप लाईन, लेन मार्किंग, वाहतूक सूचना फलक तसेच इतर आवश्यक सुरक्षा उपाययोजना तातडीने करण्यात याव्यात, अशी मागणी केली आहे. नागरिकांच्या जीविताची सुरक्षितता लक्षात घेऊन प्रशासनाने त्वरित कार्यवाही करावी. अन्यथा भविष्यात एखादी दुर्घटना घडल्यास त्याची सर्वस्वी जबाबदारी संबंधित प्रशासनाची राहील, असा इशारा नगरसेवक भूपेश रमेश मेश्राम यांनी दिला आहे.

        स्थानिक नागरिकांनीही पंचायत समिती चौकातील वाहतूक व्यवस्था अधिक सुरक्षित, शिस्तबद्ध आणि नियमबद्ध करण्यासाठी आवश्यक पायाभूत सुविधा तातडीने उपलब्ध करून देण्याची मागणी प्रशासनाकडे केली आहे. सिग्नल कार्यान्वित करण्यापूर्वी सर्व वाहतूक चिन्हे, रस्ते मार्किंग आणि पादचाऱ्यांसाठी आवश्यक सुविधा पूर्ण केल्यास अपघातांचे प्रमाण कमी होऊन वाहतूक अधिक सुरळीत होण्यास मदत होईल, अशी अपेक्षा नागरिकांनी व्यक्त केली आहे.

#Rajura #RajuraNews #Chandrapur #ChandrapurNews #TrafficSignal #ZebraCrossing #RoadSafety #TrafficManagement #MaharashtraNews #LocalNews #PanchayatSamitiChowk #RoadSafetyAwareness #VidarbhaNews #BreakingNews #RajuraCity #CitizenSafety #TrafficUpdate #OurVidarbha #AmchaVidarbha #NewsUpdate