सिग्नल, झेब्रा क्रॉसिंग ते हेल्मेटपर्यंत; विद्यार्थ्याने दिले रस्ता सुरक्षेचे धडे

खेळ, चित्रे आणि रोल प्लेच्या माध्यमातून रस्ता सुरक्षा संदेश

सनराईज स्कूलचा अभिनव उपक्रम

आमचा विदर्भ - अनंता गोखरे 

राजुरा (दि. २२ जानेवारी २०२६) -

         सनराईज स्कूलच्या विद्यार्थ्याने ब्लॅक डायमंड इंटरनॅशनल प्री-स्कूल येथे रस्ता सुरक्षा जनजागृती कार्यक्रम यशस्वीपणे आयोजित करून सामाजिक जबाबदारीचे दर्शन घडवले. वाढत्या अपघातांच्या पार्श्वभूमीवर लहान वयातच वाहतूक नियमांचे महत्त्व पटवून देणारा हा उपक्रम विशेष लक्षवेधी ठरला. या कार्यक्रमासाठी बीडीआयपीएसचे केंद्र संचालक अ‍ॅड. मनोज काकडे तसेच सनराईज स्कूलच्या मुख्याध्यापिका कु. सिमा आमटे प्रमुख उपस्थित होते. दोन्ही मान्यवरांनी या उपक्रमाचे कौतुक करत विद्यार्थ्याच्या सामाजिक जाणीवेचे अभिनंदन केले.

         कार्यक्रमाचा मुख्य उद्देश प्री-स्कूलमधील लहान मुलांमध्ये रस्ता सुरक्षेबाबत जागरूकता निर्माण करणे हा होता. सनराईज स्कूलच्या विद्यार्थ्याने वाहतूक सिग्नलचे रंग व त्यांचे अर्थ, झेब्रा क्रॉसिंगचा योग्य वापर, पादचाऱ्यांची सुरक्षितता, दुचाकीवर हेल्मेट आणि चारचाकी वाहनात सीट बेल्टचे महत्त्व अत्यंत सोप्या व समजण्याजोग्या भाषेत स्पष्ट केले. चित्रे, चार्ट्स आणि प्रत्यक्ष प्रात्यक्षिकांच्या माध्यमातून दिलेली माहिती मुलांना सहज समजली. कार्यक्रमादरम्यान ब्लॅक डायमंड इंटरनॅशनल प्री-स्कूलमधील चिमुकल्यांनी उत्स्फूर्त प्रतिसाद दिला. विविध कृती, प्रश्नोत्तरे आणि भूमिका अभिनयामुळे कार्यक्रम अधिक रंगतदार झाला. लहान वयातच रस्ता सुरक्षेचे धडे मिळाल्याने मुलांमध्ये सुरक्षित सवयी रुजण्यास मदत होणार असल्याचे शिक्षकांनी नमूद केले.

         ब्लॅक डायमंड इंटरनॅशनल प्री-स्कूलच्या शिक्षक व शिक्षकेत्तर कर्मचारीवर्गाने या उपक्रमाचे विशेष कौतुक करत सनराईज स्कूलच्या विद्यार्थ्याच्या सामाजिक उपक्रमाचे अभिनंदन केले. कार्यक्रमाच्या शेवटी सर्व मुलांनी रस्ता सुरक्षा नियम पाळण्याची सामूहिक प्रतिज्ञा घेतली. हा संपूर्ण कार्यक्रम शाळेचे सल्लागार सदस्य संदीप मालेकर आणि जयश्री मालेकर, विधाता फाउंडेशनच्या अध्यक्षा शुभांगी धोटे, शाखा प्रमुख सीमा आमटे यांच्या मार्गदर्शनाखाली तसेच शाळेच्या सहाय्यक शिक्षक व शिक्षकेत्तर कर्मचारी यांच्या नेतृत्वाखाली यशस्वीरीत्या पार पडला. शाळेमध्ये विविध उपक्रमांच्या माध्यमातून विद्यार्थ्यांना केवळ अभ्यासक्रमापुरते न ठेवता सामाजिक जाणीव देणारे शिक्षण दिले जाते, अशी उपस्थितांकडून प्रशंसा करण्यात आली.

#RoadSafetyAwareness #TrafficRules #StudentInitiative #SchoolActivity #SafeKids #RoadSafetyForChildren #SocialResponsibility #EducationWithValues #BlackDiamondInternationalPre-School #SunriseSchool #RoadSafetyRules #Adv-Manoj-Kakade #School-Principal #Sima-Amte #SandeepMalekar #JayshreeMalekar #ShubhangiDhote #VidhataFoundation #chandrapurnews #chandrapurcity #chandrapur #aamchavidarbha #vidarbha