काँग्रेस विरुद्ध भाजप, तर तिसरी आघाडी शेतकरी संघटनेची?

९ वर्षांनंतर राजुरा नगर पालिकेत नव्या लढतीचे रणशिंग

आमचा विदर्भ - दीपक शर्मा 

राजुरा (०२ नोव्हेंबर २०२५) -

        राजुरा नगर पालिकेच्या अध्यक्षपदासाठी खुल्या प्रवर्गाचे आरक्षण निघाल्यानंतर शहरातील राजकीय पटावर निवडणूक लढविणाऱ्यांची संख्या वाढली आहे. गेल्या नऊ वर्षांपासून सत्तेच्या गादीपासून दूर असलेल्या मागील सत्ताधाऱ्यांनी सत्तेचा सिंहासन मिळविण्याचे स्वप्न रंगवले असून, काँग्रेसने पुन्हा सत्ता राखण्याचे मोर्चे बांधले आहेत. दरम्यान, शेतकरी संघटना, राष्ट्रवादी काँग्रेस, गोंडवाना गणतंत्र पार्टी आणि वंचित बहुजन आघाडी या पक्षांनीही स्वतंत्र अस्तित्व दाखविण्यासाठी तयारी सुरू केली आहे.

        सन २०१६ मधील नगर पालिका निवडणुकीत काँग्रेसने अरुण धोटे यांच्या नेतृत्वाखाली सत्ता काबीज केली होती. त्या वेळी अरुण धोटे यांनी भाजपचे सतीश धोटे, अपक्ष उमेदवार स्वामी येरोलवार, शेतकरी संघटनेचे स्व. प्रा. अनिल ठाकुरवार, अपक्ष शरीफ सिद्धिकी, शिवसेनेचे नितीन पिपरे आणि बाबाराव मस्की यांचा पराभव करून विजय मिळवला होता. दुसऱ्या क्रमांकावर सतीश धोटे राहिले होते. त्या वेळी शेतकरी संघटनेचे चार, भाजपचे तीन आणि दोन अपक्ष नगरसेवक निवडून आले होते. आता नऊ वर्षांनंतरची ही निवडणूक असल्याने शहरातील राजकीय तापमान दिवसेंदिवस वाढत आहे. उमेदवारीची चर्चा चहूकडे रंगली आहे.

        काँग्रेसकडून पुन्हा अरुण धोटे आपला जुना बालेकिल्ले टिकविण्यास सज्ज असून, त्यांच्यासोबत सुनील देशपांडे, स्वामी येरोलवार आणि एड. सदानंद लांडे हेही इच्छुकांच्या यादीत आहेत. अरुण धोटे हे सर्वसामान्य जनतेशी सातत्याने संपर्कात राहणारे आणि संकटसमयी धावून जाणारे नेते म्हणून ओळखले जातात. त्यांच्या मजबूत जनाधारामुळे काँग्रेसमध्ये त्यांचे वजन आहे. त्यांच्याच काळात राजुरा शहरात अनेक विकासकामे झाली आहेत. 

        दुसरीकडे, भाजप शिबिरातही चुरस प्रचंड आहे. सतीश धोटे पुन्हा मैदानात उतरण्यास उत्सुक असून, प्रसिद्ध व्यापारी राधेश्याम अडाणिया, विनायक देशमुख, मिलिंद देशकर आणि सचिन डोहे, सुरेश रागीट व इतर अनेकांच्या नावांवरही चर्चा रंगत आहे. संघ परिवाराशी निगडित असलेले विनायक देशमुख यांनी दिवाळीनिमित्त शहरभर शुभेच्छा बॅनर लावून भाजपात खळबळ माजवली आहे, तर राधेश्याम अडाणिया यांनी पडद्याआड हालचाली सुरू केल्या आहेत.

        सामाजिक क्षेत्रात ‘बाळू फाउंडेशन’च्या माध्यमातून कार्यरत असलेले अमित महाजनवार यांनी सुद्धा मैदानात उतरण्याचे संकेत दिल्याने राजकारणाला नवाच ट्विस्ट मिळाला आहे. त्यांच्या ‘कुपोषणमुक्त’ मोहिमेमुळे त्यांची शहरात सकारात्मक प्रतिमा निर्माण झाली असून, तरुण मतदार विशेषतः महिला मतदारांत त्यांचा चांगलाच प्रभाव आहे, त्यांनी माजी आमदार सुदर्शन निमकर यांचे सुपुत्र सुशील निमकर यांच्या सोबत चक्क दिल्ली गाठून हंसराज अहिर यांची भेट घेतल्याने भाजपमधील अनेक स्थानिक नेत्यांच्या भुवया उंचावल्या आहे. अमित महाजनवार यांनी म्हटले कि हि भेट राजकीय नसून समाजकारणाशी निगडित होती, मात्र तरीही निवडणुकीच्या पार्श्वभूमीवर हि भेट येणाऱ्या काळात कशाबद्दल होती त्यावरून पडदा उठणार आहे. 

        दरम्यान, अजित पवार गटाचे राष्ट्रवादी नेते आबिद अली यांनी राजुरा, गडचांदुर, कोरपणा व जिवती येथील स्थानिक निवडणुका स्वबळावर लढविण्याची घोषणा केल्याने राष्ट्रवादीतील गटबाजी उफाळली आहे. याशिवाय, माजी आमदार आणि शेतकरी संघटनेचे नेते अँड. वामनराव चटप हे “तिसरी आघाडी” तयार करण्याच्या हालचाली करत असल्याचे बोलले जात आहे. त्यांच्या उपस्थितीमुळे निवडणुकीत काँग्रेस व भाजप यांच्यातील सरळ लढत तिरंगी होण्याची शक्यता वाढली आहे.

सध्या राजुरात गल्लीपासून सोशल मीडियापर्यंत एकच चर्चा सुरू आहे, काँग्रेस विरुद्ध भाजप कि शेतकरी संघटनेची तिसरी आघाडी?

        एकीकडे भाजपकडून मोर्चेबांधणी सुरू आहे, काँग्रेस आपल्या जुन्या कामगिरीवर विश्वास ठेवून कार्यकर्त्यांना एकत्र आणत आहे. वंचित बहुजन आघाडी, गोंडवाना गणतंत्र पार्टी आणि आदिवासी टायगर सेना या स्थानिक संघटनाही नगरसेवक पदांच्या स्पर्धेत उतरण्याच्या तयारीत आहेत.

        खुल्या प्रवर्गामुळे सर्व पक्षांसाठी ही निवडणूक खुली झाली असून, आगामी काळात अर्ज दाखल होताच शहरात राजकीय वातावरण तापणार आहे. राजुरा शहरात सध्या प्रत्येक गल्ली, चौक, आणि राजकीय कार्यालयात चर्चेचा एकच विषय “कोण घेणार नगर पालिकेचा ताज?”

#RajuraElections #RajuraPolitics #RajuraMunicipalCouncil #RajuraMunicipalCouncilelection #CongressVsBJP #RajuraBattle2025 #MaharashtraPolitics #LocalBodyElections #RajuraUpdates #PoliticalShowdown #RajuraNews #arundhote #satishdhote #radheshyamadaniya #ameetmahajanwar #vinayakdeshmukh #milinddeshkar #swamiyerolwar #advwamanrochatap #congress #bjp #shetkarisanghtna #vanchitbahujanaaghadi #aadiwasitigersena #chandrapurnews #chandrapurcity #chandrapur #aamchavidarbha #vidarbha