चंद्रपूरच्या कंत्राटी कामगारांना घरकुल योजनेचा लाभ मिळावा

चंद्रपूरच्या कंत्राटी कामगारांना घरकुल योजनेचा लाभ मिळावा

भारतीय मजदूर संघाची आमदार सुधीर मुनगंटीवार यांच्याकडे मागणी

आमचा विदर्भ - अनंता गोखरे

चंद्रपूर (दि. १२ जुलै २०२५) –

        चंद्रपूर जिल्हा हा औद्योगिक दृष्टिकोनातून अत्यंत महत्त्वाचा असून, येथे विविध खाणकामे, कारखाने व अन्य उद्योगधंदे प्रचंड प्रमाणावर सुरु  आहेत. या उद्योगांमध्ये कार्यरत असलेल्या कंत्राटी कामगारांचे जीवन अत्यंत कष्टप्रद असून, प्रदूषण व उष्णतेच्या कडाक्याचा त्यांना रोज सामना करावा लागतो.

        या पार्श्वभूमीवर, भारतीय मजदूर संघाचे जिल्हा मंत्री पवन ढवळे यांनी माजी मंत्री व आमदार सुधीर भाऊ मुनगंटीवार यांच्याकडे विशेष मागणी केली आहे की, शासनाच्या प्रधानमंत्री आवास योजना (शहरी/ग्रामीण) अंतर्गत किंवा तत्सम घरकुल योजनेचा लाभ चंद्रपूर येथील कंत्राटी कामगारांनाही मिळावा. पवन ढवळे यांनी निदर्शनास आणले की, “स्वातंत्र्याच्या अमृत महोत्सवाच्या पार्श्वभूमीवर, चंद्रपूरच्या कंत्राटी कामगारांना देखील स्वतःचे हक्काचे घर मिळाले पाहिजे. ते केवळ कामगारच नाहीत, तर जिल्ह्याच्या औद्योगिक विकासाचे खरे शिल्पकार आहेत.”

        आमदार सुधीर मुनगंटीवार यांनी या मागणीची गांभीर्याने दखल घेत, विषय शासनदरबारी मांडण्याचे आश्वासन दिले असल्याची माहितीही भारतीय मजदूर संघाच्या प्रतिनिधींनी दिली. या मागणीमुळे कंत्राटी कामगारांमध्ये आशेचा किरण निर्माण झाला असून, वर्षानुवर्षे भाड्याच्या जागांमध्ये राहणाऱ्या कुटुंबांना आता स्वतःच्या घराचे स्वप्न साकार होण्याची शक्यता निर्माण झाली आहे.