Marathi language glory day मराठी भाषा गौरव दिनानिमित्त स्पर्धा

Marathi language glory day

मराठी भाषा गौरव दिनानिमित्त स्पर्धा

मराठी भाषा आपली अस्मिता - ॲड. वामनराव चटप

आमचा विदर्भ - निशा मोहुर्ले, शहर प्रतिनिधी

राजुरा (दि. ०२ मार्च २०२५) -    

        छत्रपती शिवाजी महाराजांनी राज्यकारभार मराठी भाषेत केला तर ज्ञानेश्वर, तुकाराम यांच्यासारख्या अनेक संतांनी मराठीतून रचना करून समाजाचे प्रबोधन केले. कुसुमाग्रजांनी आपल्या भाषेला साहित्य निर्मीतीतून उंचीवर नेले. मराठी भाषेला अभिजात भाषेचा दर्जा प्राप्त झाला असतांना ही मराठी भाषा आमची अस्मिता असून आता सध्याच्या जागतिकीकरणाच्या युगात मराठी भाषा टीकूनच नव्हे तर उन्नत होण्यासाठी सर्वांचे योगदान गरजेचे असल्याचे प्रतिपादन माजी आमदार ॲड. वामनराव चटप यांनी केले.  

        मराठी भाषा गौरव दिन निमित्त आरोही सुगम संगीत विद्यालय व स्वरप्रीती कला अकादमी यांच्या संयुक्त विद्यमाने 28 फेब्रुवारीला शिवाजी महाविद्यालय सभागृहात शालेय विद्यार्थ्यांचे मराठी समूहगीत स्पर्धेचे आयोजन करण्यात आले होते. या स्पर्धेच्या उदघाटन कार्यक्रमात अध्यक्षस्थानाहून माजी आमदार ॲड. वामनराव चटप बोलत होते. स्पर्धेचे उद्घाटन माजी जि.प.सदस्य अविनाश जाधव यांनी केले. प्रमुख अतिथी माजी आमदार ॲड. संजय धोटे प्रामुख्याने उपस्थित होते. चंद्रपूर आकाशवाणी निवेदिका व योगशिक्षिका हेमा बहादे, साजिद हुसेन बियाबानी, गट शिक्षणाधिकारी मनोज गौरकार, स्वरप्रिती अध्यक्ष दिलीप सदावर्ते, आरोही सुगम संगीत विद्यालयाच्या केंद्रप्रमुख अल्का सदावर्ते, प्राचार्य संभाजी वारकड, ज्येष्ठ नागरिक संघाचे अध्यक्ष सुदर्शन दाचेवार, मसूद अहमद, अभिजीत धोटे, समीर चिलावार, राजमोहम्मद खेरानी व केंद्रे सर उपस्थित होते. कार्यक्रमात माजी आमदार ॲड. संजय धोटे यांच्या वाढदिवसानिमित्त शाल व श्रीफळ देऊन मान्यवरांच्या हस्ते सत्कार करण्यात आला. 

        आदर्श शिक्षण प्रसारक मंडळाचे सचिव अविनाश जाधव बोलतांना म्हणाले की, राजुरा भूषण प्राप्त अल्का सदावर्ते यांना श्रद्धेय प्रभाकरराव मामुलकर यांनी संगीत अकादमी काढण्याचे सुचविले होते. ते  स्वप्न सदावर्ते दाम्पत्यांनी आरोहीच्या माध्यमातून पूर्ण केले. यावेळी पाहुण्यांची समायोजित भाषणे झाली. आकाशवाणी निवेदिका हेमा बहादे यांचा शाल, श्रीफळ, साडीचोळी व स्मृतिचिन्ह देऊन सत्कार करण्यात आला.

        कार्यक्रमाचा शुभारंभ अल्का सदावर्ते आणि आरोही टीम यांच्या 'लाभले आम्हास भाग्य' या मराठी गीताने झाला. या स्पर्धेत 15 शाळेच्या सुमारे 150 विद्यार्थ्यांनी मराठी भाषेतील गायन स्पर्धेत भाग घेतला. प्रास्ताविक अल्का सदावर्ते, संचालन रेणू देशकर व आभारप्रदर्शन स्वतंत्रकुमार शुक्ला यांनी केले. 

        या समूहगीत स्पर्धेचे परीक्षण सचिन जुमडे व रिद्धी राऊत यांनी करून निकाल जाहीर केला. स्पर्धेत प्रथम क्रमांक स्टेला मॉरीस कॉन्व्हेंट, द्वितीय क्रमांक राष्ट्रसंत तुकडोजी महाराज शाळा चिंचोली खुर्द आणि तृतीय क्रमांक ऑर्चिड स्कूल राजुरा यांनी पटकाविला. सर्वांना प्रमाणपत्र व सन्मानचिन्ह देण्यात आले. कार्यक्रमाच्या यशस्वीतेसाठी आरोही व स्वरप्रीति चमूचे छोटू सोमलकर, सुनील रामटेके, अजय पुणेकर, स्वरूपा झंवर, अनुष्का रैच, रूपाली वरवाडे, रेखा रागीट, स्वतंत्रकुमार शुक्ला, प्रतिभा भावे, रचना देवगडे, प्रतिभा भावे, लता कुळमेथे, सुनिता कुंभारे, करुणा गावंडे, जयश्री मंगरूळकर, विना देशकर, ज्योती कोरडे, प्रकाश पचारे व सर्व सदस्य, विद्यार्थी यांनी सहकार्य केले.