दर दोन महिन्यांनी तब्बल १० दिवसांचा रेल्वे ब्लॉक

दर दोन महिन्यांनी तब्बल १० दिवसांचा रेल्वे ब्लॉक

विरुर स्टेशन परिसरातील नागरिकांची गैरसोय होत असल्याने नाराजी

आमचा विदर्भ - ब्युरो रिपोर्ट्स

विरुर स्टेशन (दि. ०८ डिसेंबर २०२४) -

       विरूर रेल्वे गेट परिसरात दर दोन महिन्यांनी रेल्वे कामांसाठी ४ दिवसांचा ब्लॉक घेतला जातो. मात्र, अलीकडेच या ब्लॉकचा कालावधी वाढवून १० दिवस केला जात असल्यामुळे नागरिकांना प्रचंड गैरसोय सहन करावी लागणार आहे. यामुळे कामावर जाणाऱ्या लोकांपासून ते रुग्णालयात जाणाऱ्या रुग्णांना तसेच व्यापारी व सर्वसामान्य नागरिकांना याचा मोठा त्रास सहन करावा लागणार आहे. 

        ब्लॉक दरम्यान पर्यायी रस्त्याची कोणतीही व्यवस्था दक्षिण मध्य रेल्वे कडून करण्यात आलेली नाही. नागरिकांना रेल्वे रुळ ओलांडून जीव धोक्यात घालून प्रवास करावा लागत आहे. शेतकऱ्यांनाही आपले शेतीमाल वाहतुकीसाठी मोठ्या अडचणी येत आहेत. प्रत्येक वेळी ब्लॉक जाहीर होतो, पण पर्यायी व्यवस्था का केली जात नाही. असा संतप्त सवाल नागरिकांनी केला आहे. 

        ब्लॉकच्या काळात रेल्वे रुळ ओलांडताना अपघात होण्याची शक्यता वाढते. विशेषतः शाळकरी मुले, ज्येष्ठ नागरिक आणि महिलांना या परिस्थितीचा सामना करताना अडचणी येत आहेत. नागरिकांच्या मते काम आवश्यक आहे मात्र त्यासाठी पर्यायी रस्ते तयार करणे हे दक्षिण मध्य रेल्वे विभागाच्या प्रशासनाची जबाबदारी आहे. हे दुर्लक्ष रेल्वे विभागाकडून केल्या जाणे हे गंभीर आहे, असे विरुर परिसरातील स्थानिक नागरिकाने सांगितले.

        रेल्वे अधिकाऱ्यांनी सांगितले की, कामाची गती वाढवण्यासाठी ब्लॉकचा कालावधी वाढवला जातो. मात्र, नागरिकांना त्रास होणार नाही यासाठी पुढील काळात पर्यायी रस्त्यांची व्यवस्था करण्याचा प्रयत्न केला जाईल. 

        नवनिर्वाचित आमदार देवरावदादा भोंगळे यांनी या समस्येवर लक्ष देऊन दक्षिण मध्य रेल्वे विभागाला तातडीने उपाययोजना करण्यास पाठपुरावा करून तोडगा काढतील अशी अपेक्षा परिसरातील नागरिकांकडून केली जात आहे.

        नागरिकांना आता या समस्येवर त्वरित तोडगा निघेल, अशी अपेक्षा आहे. रेल्वे प्रशासनाने आणि स्थानिक प्रतिनिधींनी या प्रकरणाचा गांभीर्याने विचार करावा, अशी मागणी जोर धरत आहे.

#10daysrailwayblock #Railway #WirurStation #citizens #Patients #hospital #trouble #SouthCentralRailway #RailwayDivision #School #children #seniorcitizens #women #NewlyelectedMLA #MLA #DevravadaBhongle