हर्षा कंपनीत तोडफोड, कंपनी जाळण्याची दिली धमकी

शिवसेना शहर प्रमुखावर गुन्हा दाखल

आमचा विदर्भ - दीपक शर्मा

राजुरा (दि. 15 डिसेंबर 2023) -

        वेकोलि बल्लारपूर क्षेत्रांतर्गत पोवनी उपक्षेत्रात ओव्हरबर्डन व कोळसा उत्खननाचे काम करणारी हर्षा कन्स्ट्रक्शन कंपनीत शिवसेनेचे शहरप्रमुख सूर्यवंशी आणि त्यांच्यासोबत स्कॉर्पिओमध्ये आलेले अन्य तीन जण दुपारी एकच्या सुमारास साखरी येथील प्रकल्प कॅम्प कार्यालयात आले. शिवसेना शहरप्रमुख सूर्यवंशी व त्यांच्यासोबत असलेल्या अन्य तीन व्यक्तींनी कार्यालयात येऊन कामगारांना कायम करणे, अनुदान व सुविधा देण्याबाबत दिलेल्या निवेदनाचे काय झाले, याबाबत उपस्थित कर्मचाऱ्यांकडून विचारणा केली. उपस्थित कर्मचाऱ्यांनी सांगितले कि, वेकोलि पोवनी 2 उपप्रादेशिक कार्यालयात जाऊन चौकशी करा, तेथून आदेश मिळाल्यास आम्ही कन्फोर्मेशन देऊ. हे ऐकून त्यांनी आमच्या खर्चासाठी काही पैशांची मागणी केली. परंतु उपस्थित कर्मचाऱ्याने पैसे देण्यास असमर्थता दर्शविल्यास शिवसेना शहरप्रमुख खुशाल उमाकांत सूर्यवंशी यांनी कार्यालयाच्या खिडकीच्या काचा फोडून कार्यालयाची तोडफोड केली आणि आमच्या मागण्या मान्य न केल्यास कंपनी जाळून टाकण्याची धमकी कंपनीच्या कर्मचाऱ्यांना दिली. मुख्य गेटवर दुसऱ्या शिफ्टसाठी येणाऱ्या कामगारांना सुमारे तासभर कामावर जाण्यापासून रोखण्यात आले. त्यामुळे कंपनीचे कामकाज तासभर विस्कळीत झाले होते. कंपनी व्यवस्थापकाने शिवसेना शहरप्रमुख खुशाल उमाकांत सूर्यवंशी यांच्यासह तिघांविरुद्ध पोलिसांत तक्रार दाखल केली आहे. पोलिसांनी सूर्यवंशी आणि अन्य तिघांविरुद्ध भादंवि 336, 34, 384, 451, 504, 506 अन्वये गुन्हा दाखल केला आहे. मात्र, सूर्यवंशी आणि त्याचे साथीदार पोलिसांपासून तावडीतून दूर आहेत. पुढील तपास पोलीस करत आहेत. (aamcha vidarbha) (rajura) (shivsena)