विजेच्या स्पर्शाने युवकाचा मृत्यू

विजेच्या स्पर्शाने युवकाचा मृत्यू

एच.एन. (राजेश) अरोरा - आमचा विदर्भ प्रतिनिधी

बल्लारपूर / कोठारी -

जिवंत विद्युत तारांचा स्पर्श झाल्याने राहुल सुधाकर खामनकर वय १८ वर्षे रा. तोहोगाव या युवकाचा उपचारा दरम्यान मृत्यू झाल्याची घटना सोमवारला दुपारी घडली. मृतक राहुल याने नुकतीच बारावीची परीक्षा उत्तीर्ण केली मात्र त्याच्या मृत्यूमुळे तोहोगावात शोककळा पसरली असून सर्वत्र हळहळ व्यक्त करण्यात येत आहे.

सुधाकर खामनकर हा अल्पभूधारक शेतकरी असून त्याचा एकुलता एक मुलगा राहुल याने नुकतीच माध्यमिक शालांत परीक्षा उत्तीर्ण केली होती. पुढील शिक्षणाकरिता पैसे गोळा करण्याच्या उद्देशाने मजुरी करण्याकरिता तोहोगाव येथील नितेश इटनकर यांच्या घरी गेला. घराच्या दुसऱ्या मजल्यावर घराचे प्लास्टर चे काम सुरू होते. घरातील वीज प्रवाह बंद करण्यास राहुल गेला असता जिवंत वीज प्रवाहित तारांना अचानक स्पर्श झाल्याने गंभीर जखमी झाला. त्याला ताबडतोब तोहोगाव येथील प्राथमिक आरोग्य केंद्रात उपचारार्थ दाखल करण्यात आले. मात्र प्रकृती गंभीर असल्याने जिल्हा रुग्णालयात चंद्रपूर येथे हलविण्यात आले पण उपचार करण्यापूर्वीच डॉक्टरांनी मृत घोषित केले. अठरा वर्षीय राहुल च्या निधनामुळे गावात हळहळ व्यक्त करण्यात येत असून गावात सर्वत्र शोकुकळा पसरली आहे.