वरूर येथील जुगार क्लबच्या अध्यक्षाची तुरुंगात रवानगी

• वरूर येथील जुगार क्लबच्या अध्यक्षाची तुरुंगात रवानगी
• ८५ जुगाऱ्यांची जामिनावर सुटका

अविनाश रामटेके - आमचा विदर्भ प्रतिनिधी

विरूर स्टेशन -

तालुका मुख्यालयापासून सहा किमी अंतरावर असलेल्या वरूर रोड गावात युथ सोशल क्लबवर पोलिसांनी धाड टाकून १७ लाखाचा मुद्देमाल जप्त केला आहे. या कारवाईत क्लबचा अध्यक्ष व्यंकटेश तोटासह ८५ जुगाऱ्यांना अटक करण्यात आली. अटकेतील व्यंकटेश यांना न्यायालयात हजर केले असता त्याला न्यायालयीन कोठडी सुनावण्यात आली आहे. तर अन्य ८५ आरोपींची जामिनावर सुटका करण्यात आली आहे.

वरूर रोड गावात युथ सोशल क्लब हा मागील काही दिवसांपासून सुरू आहे. क्लबला परवानगी देताना अटी व शर्तीचे पालन करावे अशी अट टाकण्यात आली होती. रात्री दहा वाजेनंतर क्लब बंद करावा असे नमूद होते. पण घटनेच्या दिवशी रात्री उशिरापर्यंत क्लब सुरू असल्याची माहिती जिल्हा अप्पर पोलीस अधीक्षक अतुल कुलकर्णी यांना मिळताच त्यांनी रात्री ११.३० वाजता धाड टाकली. दरम्यान धाडीची कारवाई सुरू असताना पोलिसांना धक्काबुक्की करण्यात आली. त्यामुळे व्यंकटेश तोटासह तिघांवर गुन्हे दाखल करण्यात आले. तोटाला सोमवारी न्यायालयीन कोठडीत पाठविले आहे.