अभिनेत्री सोहा अली खान आणि अभिनेता कुणाल खेमू यांनी केली ताडोबा सफारीची सैर

• अभिनेत्री सोहा अली खान आणि अभिनेता कुणाल खेमू यांनी केली ताडोबा सफारीची सैर 
• रूद्रा वाघ व छोटी राणीसह इतर वन्यजीवांचे झाले दर्शन

आमचा विदर्भ - ब्युरो रिपोर्ट्स

चंद्रपुर -

चंद्रपूर जिल्ह्यातील ताडोबा अंधारी व्याघ्र प्रकल्प वाघांसाठी ओळखला जातो. ताडोबातील भ्रमंतीसाठी देशातील क्रिकेटपटू, उद्योगपती, चित्रपट अभिनेते, अभिनेत्री आणि राजकीय नेते ताडोबात पोहोचतात आणि जंगल सफारीचा हरवलेला आनंद लुटतात. सोमवारी दुपारी चित्रपट अभिनेते कुणाल खेमू आणि चित्रपट अभिनेत्री सोहा अली खान भ्रमंतीसाठी चंद्रपूरच्या ताडोबाला पोहोचले होते. यावेळी त्यांच्यासोबत त्यांची मुलगी इनाया नौमी खेमूही होती. कुणाल खेमू आणि सोहा अली खान सोमवारी दुपारी नागपूर चिमूर कोलारा गेटमार्गे ताडोबात दाखल झाले. त्यांनी विश्रांतीसाठी बांबु रेसार्ट बुक केले होते.

विश्रांतीनंतर सोमवारी सायंकाळी त्यांनी कोलारा बफर परिसरात भ्रमंती केली. तिथे त्यांना रुद्रा वाघाचे दर्शन झाले. मंगळवारी सकाळी शिरकाडा बफर परिसरात केलेल्या भ्रमंतीत त्यांना छोटी राणीने दिसली. भ्रमंतीदरम्यान वाघाच्या पायाचे ठसे, सांबर, चितळ, अस्वल त्यांना दिसले. वाघ आणि वाघिणीचे दर्शन पाहून कुणाल खेमू, सोहा अली खान आणि त्यांची मुलगी इनाया नौमी खेमू आनंदित झाले होते. यावेळी त्यांनी अनेक वन्यप्राण्यांची छायाचित्रे आणि व्हिडिओ आपल्या कॅमेऱ्यात कैद केले. भ्रमंतीदरम्यान मार्गदर्शक म्हणून राजू अलोणे यांनी त्यांना वन्यजीवांबाबत मार्गदर्शन केले. यावेळी त्यांच्यासोबत बांबु रेसार्टचे संचालक सुदीप मेहता, व्यवस्थापक अक्षय हेही उपस्थित होते.