अबब! म्हैस दूध काढू देत नाही म्हणत शेतकऱ्याने केली पोलीस ठाण्यात तक्रार

• अबब! म्हैस दूध काढू देत नाही म्हणत शेतकऱ्याने केली पोलीस ठाण्यात तक्रार

आमचा विदर्भ - ब्युरो रिपोर्ट्स

भिंड -

मध्य प्रदेशातील भिंड जिल्ह्यात पोलिसांसमोर एक विचित्र प्रकरण समोर आले आहे. हे पाहून भिंड पोलीसही हैराण झाले. पण भिंड पोलिसांनी या प्रकरणाची उकल रंजक पद्धतीने केली. भिंड जिल्ह्यातील नया गावात राहणारे बाबूराम हे आपल्या म्हशीची तक्रार घेऊन शनिवारी नया गाव पोलीस ठाण्यात पोहोचले. म्हैस आपल्याला दूध काढू देत नाही, अशी तक्रार त्यांनी पोलिसांत दिली.

एवढेच नव्हे तर बाबुराम यांनी एक लेखी अर्जही पोलिसांना दिला. पोलिसांनी बाबूरामला समजावून सांगितले. यानंतर बाबूराम माघारी गेले. मात्र, काही वेळाने ते आपल्या म्हशीसह पोलीस ठाण्यात आले. बाबूराम यांनी म्हैस पोलीस ठाण्यात बांधली आणि म्हशीचे दूध आणण्यास मदत करावी, असं त्यांनी पोलिसांना सांगितलं. हे पाहून प्रकरण इतकं सोपं नसल्याचं नया गाव पोलिस ठाण्याच्या पोलिसांच्या लक्षात आलं.

यानंतर नयागाव पोलीस ठाण्याने पशुवैद्यकीय डॉक्टरांच्या मदतीने बाबूराम यांना म्हशीचे दूध कसे काढायचे ते सांगितले. यासोबतच म्हशींना कोणत्याही आजाराची लक्षणे नसल्याची माहितीही देण्यात आली. मात्र, बाबूराम यांना काहीही अडचण आल्यास त्यांना नक्कीच मदत करतील, असं पोलीस अधिकाऱ्यांनी सांगितलं. पूर्वी आपली म्हैस रोज पाच लिटर दूध देत होती. गेल्या दोन दिवसांपासून ती दूध काढू देत नाहीए. दूध काढण्यास मदत करा, असं बाबूराम यांनी पोलिसांना सांगितलं.